ԱՄՆ-ն Հայաստանի հետ կարևոր բանակցություններ է վարում

ԱՄՆ սենատի արտաքին հարաբերությունների հանձնաժողովի առջև լսումների ժամանակ Ռուսաստանում ԱՄՆ դեսպանի թեկնածու Լին Թրեյսին խոսել է հայ-ամերիկյան և հայ-ռուսական հարաբերություններից։ Մինչև ԱՄՆ նախագահ Ջո Բայդենի կողմից Ռուսաստանում ԱՄՆ դեսպանի պաշտոնում առաջադրվելը նա նույն պաշտոնն էր զբաղեցնում Երևանում։

«Հայերն ինձ ասում են, որ քանի որ չեն ուզում վերադառնալ անցյալ՝ կոռումպացված առաջնորդների մոտ, նրանք ուզում են ավելի պայծառ ապագա գտնել: Կրկին քննարկվում է Ռուսաստանի թեման, խնդիրը սա է։ Հայերը ասում են, որ տեսնում են, որ Ռուսաստանի հետ իրենց նախկին և ներկայիս հարաբերությունները չեն բավարարում այսօրվա Հայաստանի կարիքներին։ Կարծում եմ՝ մենք՝ ԱՄՆ-ն և Հայաստանը, այժմ գտնվում ենք հաջորդ փուլում, մենք մի քանի կարևոր բանակցություններ ենք վարում, թե ինչպես մենք կարող ենք օգտակար լինել Հայաստանին, որն, իմ կարծիքով, շարունակում է ձգտել ավելի ժողովրդավարական և ապահով ապագայի»,- ասել է Թրեյսին։

«Կան նաև բազմաթիվ անվտանգային մարտահրավերներ, որոնցում Ռուսաստանը դեր է խաղում, և որոնց մենք պետք է ուշադրություն դարձնենք»,- հավելել է ամերիկացի դիվանագետը։

Աղբյուր՝ 168.am