Վարչապետին ուղղված նամակի պատասխանից է կախված քայլերի հաջորդականությունը. Բրյուսովի ուսանող

Վարչապետի աշխատակազմը երեք շաբաթ անց էլ դեռ չի պատասխանել Բրյուսովի անվան պետական համալսարանի ղեկավարության, պրոֆեսորադասախոսական անձնակազմի եւ ուսանողների կողմից Կառավարության ընդունարան հանձնած նամակին, որում բրյուսովցիներն առաջարկում էին կանգնեցնել երեք բուհերի միավորման գործընթացը, որի հետեւանքով պետք է լուծարվեն Բրյուսովն ու Ֆիզկուլտինստիտուտը։ Այս մասին NEWS.am-ի հետ զրույցում ասաց Բրյուսովի անվան համալսարանի Սոցիալական գիտությունների եւ սերվիսի ֆակուլտետի 3–րդ կուրսի ուսանող Ելենա Բդոյանը։

Երկու շաբաթ է՝ Բրյուսովի անվան համալսարանում վերսկսվել են դասապրոցեսը, ուսանողներն ու պրոֆեսորադասախոսական անձնակազմը որոշել էին դադարեցնել գործադուլն ու դասադուլը, երբ հանդիպել էին Բրյուսովի անվան պետական համալսարանի հոգաբարձուների խորհրդի նախագահ, փոխվարչապետ Համբարձում Մաթեւոսյանի հետ։

Հոկտեմբերի 21–ին Համբարձում Մաթեւոսյանի եւ բուհի ղեկավարության հանդիպման ժամանակ նշվել էր, որ վարչապետին ուղղված համալսարանի ուսանողների եւ աշխատողների նամակի պատասխանը կտրամադրվի հնարավորինս սեղմ ժամկետում։ Բացի այդ ընդգծվել էր, որ բուհերի միավորման գործընթացը տեղի է ունենալու «ՀՀ կրթության մինչեւ 2030 թվականը զարգացման պետական ծրագիրը հաստատելու մասին» ՀՀ օրենքի ուժի մեջ մտնելուց հետո միայն։

Հանդիպմանը պայմանավորվածություն էր ձեռքբերվել շահագրգիռ կողմերի հետ շարունակել քննարկումները՝ խոշորացվող բուհերի ձեւավորման առավել արդյունավետ մոտեցումները նախանշելու համար։

Արդյո՞ք սա նշանակում է, որ բրյուսովցիներն այսքանով ավարտում են բողոքի ակցիաները. Ելենա Բդոյանն ասաց, որ վարչապետին ուղղված նամակի պատասխանից է կախված Բրյուսովի անվան պետական համալսարանի ղեկավարության, պրոֆեսորադասախոսական անձնակազմի եւ ուսանողների քայլերի հաջորդականությունը։

Բուհերի միավորմանը դեմ Բրյուսովի անվան համալսարանում անհամբեր սպասում են վարչապետին ուղղված նամակի պատասխանին։

Աղբյուր՝ News.am