«Ո΄չ մարզպետ կա, ո΄չ քաղաքապետ կա, ո΄չ էլ մեզ լսող կա». բեռնատարների վարորդները շարունակում են բողոքի ակցիան

Սիսիան- Մեղրի ավտոճանապահին մոտ 2000 բեռնատարների վարորդներ շարունակում են նախօրեին սկսած իրենց բողոքի ակցիան` փակ պահելով ճանապարհը: Վարորդները դժգոհ են ճանապարհներին տեղադրված կշեռքներից, որոնք այդ ճանապարհահատվածում տեղադրվել են մի քանի օր առաջ։ Եթե բեռնատարների բեռը սահմանված չափից ավելի է, ապա վարորդները տուգանվում են 200 հազար դրամով:

«Իրենք ասեցին, որ ավտոն գրուզով պետք է լինի 26 տոննա, մենք բարձել ենք 25 տոննա, էս անգամ ասեցին սռնիներով ենք կշռում, բայց Հայաստանի պայմանները թույլ չեն տալիս սռնիներով բարձել: Ստացվում է` կամ պիտի չաշխատենք, կամ պիտի մեր հարցին լուծում տան: Այսօր արդեն երկրորդ օրն է` մենք կանգնած ենք, ոչ մարզպետ կա, ոչ քաղաքապետ  կա, ոչ էլ մեզ լսող կա»,-NEWS.am-ի հետ զրույցում ասաց բեռնատարներից մեկի վարորդը, որը նույնպես մասնակցում էր բողոքի ակցիային:

Մեկ այլ վարորդ էլ բողոքեց, որ Իրանում բեռնատարը կշռել են, Մեղրիի անցակետում եւս նորմալ է եղել, իսկ տվյալ հատվածում` ըստ սռնիների բեռնվածության բեռնատարը գերբեռնված է:

«Մեկը կգա՞ մեզ բացատրի` ոնց են նման հաշվարկ արել, որ նման պրոբլեմի առաջ են կանգնացրել մեզ»,-ասաց վարորդը:

Վարորդները նշեցին, որ այս պահին թույլատրում են` մարդատար մեքենաները անցնեն, բայց եթե իրենց հարցը չլուծվի, ոչ մի մեքենայի թույլ չեն տալու անցնել: