Դե պատկերացրեք հեռավոր Արևմուտքից մի Վահան Արամունի գրող լինի, որը ԱՄՆ-ով շրջի ու իր ազգակիցներին ասի՝ գնացեք երկիր սարքել սովորեք

Օրերս մի հայ գրող՝ Վահան Արամունին, գնացել էր Արևմտյան Հայաստան։ Թուրքիայի գցած ասֆալտն էր տեսել ու բոլորիս վրա մուննաթ էր գալիս՝ գնացեք երկիր սարքել սովորեք։

 

Գրողն, իհարկե, պիտի դույզն-ինչ միտք, ապրումակցում, ընկալում ունենար հասկանալու համար, թե ինչպես է եղել, որ թուրքը հարստացել է մեր հողի վրա և ինչպես է եղել, որ հայ ժողովուրդն աղքատացել է, թե ինչպես Սովետքի քանդվելով սարքված երկիրը քանդվեց ու կամաց-կամաց նորից սարքվեց։ Բայց դա էլ է օրինաչափ․ աղքատ, թալանված ժողովրդից չտեսներ են գոյանում, որովհետև աղքատ ժողովրդի զավակը հարուստ է ուզում լինել, փառքը պարտադրում է առանձնանալ աղքատներից։

 

Եվ այս առիթով մի զուգահեռ․ մեզ բախտակից ժողովուրդը՝ հեռավոր Արևմուտքի բնիկները իրենցից թալանածի մի մասի հաշվարկն են արել ու գրում են․

 

«Մեր ժովողուրդը աղքատ չի, նրան թալանել են․

Ես մի հետազոտություն եմ արել Բլեք հիլզ (Խե Սապա) ոսկու արդյունահանման վերաբերյալ:

Մինչև 1965 թվականը Բլեք հիլզից հանվել էր մոտավորապես 31,207,892 ունցիա ոսկի:

Ոսկու արժեքը տարիների ընթացքում տատանվում էր, բայց այսօր այն գնահատվում է մոտ 1,204,50 դոլար մեկ ունցիայի համար:

Դա հավասար է $37,589,905,914 (երեսունյոթ միլիարդ հինգ հարյուր ութսունինը միլիոն ինը հարյուր հինգ հազար ինը հարյուր տասնչորս դոլար) ոսկու, որը վերցվել է Բլեք հիլզից այսօրվա շուկայական արժեքով: Սա չի ներառում ոսկու բաժինը, որը վերցվել է 1965թ.-ից հետո: Գրազ եմ գալիս, որ այն տրիլիոնների է հասնում։

Հիշեցնեմ, որ Ֆորտ Լարամի պայմանագրով (և պայմանագրերը երկրի գերագույն օրենքն են՝ ըստ ԱՄՆ Սահմանադրության), Բլեք հիլզը պատկանում է Օցետի Սակովինին (Սիու մեծ ազգին), և Միացյալ Նահանգների Գերագույն դատարանը ԱՄՆ-ն ընդդեմ հնդկացիների Սիու ազգի գործով վճռել է որ Բլեք հիլզի գողությունը Օցետի Սակովինից անօրինական գործողություն էր՝ առանց արդարացի փոխհատուցման:

Չեմ ուզում այլևս լսել հարցը, թե ինչու են մեր ռեզերվացիաներն այդքան աղքատ: Աղքատությունը պարտադրել են մեզ։ Եվ այս թալանի վրա է Ամերիկայի տնտեսությունը հենվել 10-ամյակներ շարունակ։ Նկ․ Սիկսիա (Սև ոտք) ազգից զույգ է»։

 

Դե պատկերացրեք հեռավոր Արևմուտքից մի Արամունի գրող լինի, որը ԱՄՆ-ով շրջի ու իր ազգակիցներին ասի՝ օգնացեք երկիր սարքել սովորեք։

 

Նկարում Բլեք հիլզի համար մղվող կռիվն է, որտեղ ԱՄՆ-ն ոսկի հայտնաբերելուց հետո զոռով վռնդեց բնիկներին իրենց տներից։