Վարչապետն ասում է՝ շինարարությունում ակտիվություն կա, իսկ ԱՎԾ-ն 8.7 տոկոսով անկում է գրանցել

«Առավոտ» օրաթերթը գրում է․ «Ազգային վիճակագրական ծառայությունը երեկ հրապարակել է ՀՀ սոցիալ- տնտեսական իրավիճակը բնու­թագրող ընթացիկ-օպերատիվ ամփոփմամբ ստացված նախնա­կան հիմնական մակրոտնտեսա­կան ցուցանիշները:

Ըստ այդմ՝ Հայաստանի տնտե­սական ակտիվության ցուցանիշը 2017 թվականի հունվար-հուլիսին, նախորդ տարվա նույն ժամանակահատվածի համե­մատ, աճել է 6,2%-ով: Արդյունաբերության ոլորտում 12.7% աճ է գրանցվել: Արդյու­նաբերության արտադրանքի ծավալն այս տարվա 7 ամիսնե­րին կազմել է 899 միլիարդ 590 միլիոն դրամ:

Իսկ ահա գյուղատնտեսության ոլորտում անկում է գրանցվել՝ 2.1%: Գյուղատնտեսության հա­մախառն արտադրանքի ծավալն այս տարվա հունվար-հուլիսին կազմել է 334 միլիարդ 833 մի­լիոն դրամ:

Թեև վարչապետ Կարեն Կարապետյանն օրերս հայտարարել էր՝ «Արդեն իսկ մեկնարկել են բազմաթիվ ծրագրեր մայրաքաղաքում ու մարզերում և, այդ առումով, վիճակագրությունը, որ այս պահին ունենք, բավականին հետաքրքիր է և հուսադրող: Մենք պատրաստ ենք լրացուցիչ նպաստավոր պայմաններ ստեղ­ծել շինարարի համար և տնտե­սության զարգացման, և ներդ­րումների ապահովման նպատա­կով: Ցանկանում եմ ֆիքսել, որ շինոլորտում ակտիվության հս­տակ միտումներ ունենք և համոզմունք ենք հայտնում, որ շի­նարարության տեմպերի աճի առումով ունենալու ենք առաջըն­թաց», սակայն, այս ոլորտում էլ անկում է գրանցվել: Շինարարության ծավալը 2017 թվականի հունվար-հուլիսին, նա­խորդ տարվա նույն ժամանակահատվածի համեմատ, նվազել է 8.7%-ով, շինարարության ծա­վալը դրամով կազմել է 143 մի­լիարդ 859 միլիոն: Առևտրաշրջանառությունը այս տարվա 7 ամիսներին կազմել է 1 տրիլիոն 346 միլիարդ, այն նախորդ տարվա նույն ժամանակահատվածի համեմատ աճել է 12.2%-ով: Իսկ ծառայություննե­րի ծավալն, առանց առևտրի, աճել է 11.8%-ով, ծառայություն­ների ծավալը դրամով կազմել է 774 միլիարդ 537 միլիոն:

Այս տարվա հունվար-հուլիսին էլեկտրաէներգիայի արտադրու­թյունն աճել է 7.8%-ով, այն կազմել է 4.4 միլիոն կվտ/ժ:

Ըստ ԱՎԾ-ի՝ սպառողական գների ինդեքսը այս տարվա հունվար-հուլիսին աճել է 0.5% -ով»:

Մանրամասները՝ «Առավոտ»  թերթի այսօրվա համարում: