Ադրբեջանի ռազմաքաղաքական ղեկավարության 60 ներկայացուցչի հանդեպ հայտարարված է քրեական հետապնդում․ Արթուր Դավթյան

44-օրյա պատերազմին առնչվող քրեական գործերով քրեական հետապնդում է հարուցվել Ադրբեջանի ռազմաքաղաքական ղեկավարության 60 ներկայացուցչի նկատմամբ:Այսօր ԱԺ-ում կայացած պետական-իրավական հարցերի մշտական հանձնաժողովի նիստի ժամանակ այս մասին ասաց ՀՀ գլխավոր դատախազ Արթուր Դավթյանը։ Վերջինս նշեց, որ դատախազությունն ունի օբյեկտիվ ապացույցներ, որ 44-օրյա պատերազմում Ադրբեջանի ռազմաքաղաքական ղեկավարության և զինծառայողների կողմից թույլ են տրվել միջազգային մարդասիրական իրավունքի կոպիտ խախտումներ:

«Կոնկրետ դեպքերով կանխամտածված թիրախավորվել են բնակավայրերը, քաղաքացիական անձինք, իրականացվել է քաղաքացիական անձանց սպանություն, խախտվել են պատերազմ վարելու կանոնները, կիրառվել են արգելված զինատեսակներ, թիրախավորվել և ոչնչացվել են հայկական պատմամշակութային արժեքներ»,-մանրամասնեց Դավթյանը՝ հավելելով, որ ապացույցներ կան նաև ազգային ատելության հողի վրա իրականացված բռնությունների, խոշտանգման և սպանության դեպքերի հետ կապված։

Քրեական գործով ձեռք բերված օբյեկտիվ ապացույցները, ինչպես շեշտեց ՀՀ գլխավոր դատախազը, ակնհայտորեն վկայում են այն մասին, որ 2020 թվականի դեռևս հունիս-հուլիս ամիսներից Սիրիայի հյուսիսային հատվածներից հանրահայտ ահաբեկչական խմբավորումների կողմից իրականացվել են վարձկանների հավաքագրումներ, որոնք անարգել տեղափոխվել են Թուրքիայի, այնտեղից էլ՝ Ադրբեջան:

«Ադրբեջանի տարածքում վարձկանները ռազմական պատրաստություն են անցել՝ հատկապես լեռնային հատվածներում մարտ վարելու համար: Նրանց հրահանգավորված էր թիրախավորել, սպանել, խոշտանգել բնակավայրերում գտնվող քաղաքացիական բնակչությանը»,-նշեց Դավթյանը՝ մեջբերելով ձերբակալված սիրիացի վարձկանների ցուցմունքները։

Աղբյուր` Փաստինֆո