Աննա Դանիբեկյանը Արմեն Գևորգյանին թույլ տվեց լքել ՀՀ սահմանը, Գևորգյանը Ստրասբուգում խոսելու է Արցախից

Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, թույլատրեց ՀՀ նախկին փոխվարչապետ, «Հայաստան» խմբակցության պատգամավոր Արմեն Գևորգյանին մեկնել Ստրասբուրգ՝ մասնակցելու ԵԽԽՎ նիստին։

«Փաստինֆո»-ի թղթակցի հաղորդմամբ՝ Արմեն Գևորգյանի պաշտպան Լուսինե Սահակյանը միջնորդություն է ներկայացրել դատարան՝ խնդրելով Գևորգյանին թույլատրել հատել ՀՀ սահմանը։ Նա նշեց, որ ապրիլի 25-ից 28-ը կայանալու են Եվրոպայի խորհրդի խորհրդարանական վեհաժողովի հերթական լիագումար նիստերը, որը տեղի է ունենալու Ստրասբուրգում ու Արմեն Գևորգյանը, որպես ԱԺ պատգամավոր, պարտավոր է ներկա լինել նիստին։ Սահակյանը տեղեկացրեց, որ Արմեն Գևորգյանը պատրաստվում է Ստրասբուրգում հայտարարությամբ հանդես գալ՝ բարձրացնելով Արցախի շուրջ ստեղծված իրավիճակը։

Լուսինե Սահակյանը խնդրեց դատարանին թույլատրել Արմեն Գևորգյանին ապրիլի 23-ից ապրիլի 29-ը բացակայել ՀՀ տարածքից։ Պաշտպանության կողմը դատարանին ներկայացրեց նաև ԱԺ նախագահի կարգադրությունը, որով Արմեն Գևորգյանը ապրիլի 23-ից մինչև 29-ը գործուղվելու է Ստրասբուրգ։ Բացի այդ՝ ԵԵԽՎ նախագահը Արմեն Գևորգյանի անձեռնմխելիության պաշտպանության միջնորդություն է ուղարկել ու նշել, որ Արմեն Գևորգյանն ունի անձեռնմխելիություն ու արտոնություններ, սակայն նախագահողն արձանագրեց, որ այս պահին չի քննարկվում Արմեն Գևորգյանի անձեռնմխելիության հարցը, հետևաբար, ԵԽԽՎ նախագահի գրությունը որևէ կապ չունի այս միջնորդության հետ։

Ռոբերտ Քոչարյանի պաշտպան Արամ Օրբելյանը միացավ միջնորդությանը, նշելով, որ միջազգային խորհրդարանական մարմինների աշխատանանքերին մասնակցելու հնարավորություն պետք է ունենան ինչպես իշխանական, այնպես էլ ընդդիմադիր քաղաքական գործիչները։

«Ֆիզիկապես մասնակցելու հնարավորություն չտալը ևս մեկ անգամ կվերահաստատի իմ այն պնդումը, որ տեղաշարժի ազատության սահմանափակումն այլ նպատակներ ունի», - ասաց Օրբելյանը։

Մեղադրող Պետրոս Պետրոսյանը նկատեց, որ ԵԽԽՎ նիստին կարելի է մասնակցել նաև հիբրիդային եղանակով, ինչին պաշտպան Սահակյանն արձագանքեց՝ նշելով, որ հիբրիդային եղանակով Արմեն Գևորգյանը չի կարող հանդիպել որևէ պատվիրակի հետ։

Հաշվի առնելով, որ Արմեն Գևորգյանը պատրաստվում է ԵԽԽՎ-ում բարձրացնել Արցախյան հակամարտության վերաբերյալ հարցեր, դատարանը վերջապես թույլ տվեց ընդդիմադիր պատգամավորին մեկնել Ստրասբուրգ։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Աղբյուր` Փաստինֆո