Բլոգեր Լապշինը խնդրել է իրեն արտահանձնել Իսրայելին

Բլոգեր Ալեքսանդր Լապշինը պաշտոնական դիմում է ներկայացրել և խնդրել իրեն արտահաձնել Իսրայելին, այս մասին հայտնում է ТАСС գործակալությունը։

Հայտնի է, որ այսօր կայացել է նրա և Բաքվում Իսրայելի դեսպանության հյուպատոսի հանդիպումը, պատմել է Լապշինի փաստաբան Էդուարդ Չերնինը։

Ադրբեջանի արդարադատության նախարարության՝ մարդու իրավունքների և հասարակայնության հետ կապերի բաժնի ղեկավար Ֆաիգ Ղուրբանովն, իր հերթին հայտարարել է, որ Լապշինի դիմումը կարող է քննվել միայն նրա հանդեպ կայացված դատական որոշման ուժի մեջ մտնելուց հետո։

Հիշեցնենք, որ Ռուսաստանի, Իսրայելի և Ուկրաինայի քաղաքացի հանդիսացող բլոգեր Ալեքսանդր Լապշինը ձերբակալվել է Մինսկում 2016 թվականի դեկտեմբերի 15-ին՝ Ադրբեջանի դիմումի համաձայն, և արտահանձնվել Բաքվին 2017 թվականի փետրվարի 7-ին:

Բաքվի ծանր հանցագործությունների դատարանը Լապշինին դատապարտել է երեք տարվա ազատազրկման։

ՀՀ արտաքին գործերի նախարարության մամուլի խոսնակ Տիգրան Բալայանը, անդրադառնալով բլոգերի արտահանձնմանը, հայտարարել էր, որ Ալեքսանդր Լապշինի հետապնդումը, Ադրբեջան նրա արտահանձնումը խոսքի ազատության և ազատ տեղաշարժի, մարդու հիմնարար իրավունքների կոպտագույն ոտնահարում է, որը կրկին անգամ ի ցույց է դնում բռնապետության և ժողովրդավարության միջև առկա խորը անդունդը։

Աղբյուր` Tert.am