Նազելի Բաղդասարյանի եղբայրը լքում է ՔՊ-ն, իսկ կինը՝ նոր պաշտոնը

Շիրակի մարզպետ Նազելի Բաղդասարյանի եղբայրը՝ Արման Բաղդասարյանը դադարեցնում է «Քաղաքացիական պայմանագիր» կուսակցության անդամակցությունն ու վայր է դնում Գյումրու ավագանու անդամի մանդատը:

Այս մասին Բաղդասարյանը  գրել է «Ֆեյսբուք»-իր իր էջում՝ հրապարակելով ՔՊ կուսակցության վարչության նախագահ Սուրեն Պապիկյանին և Գյումրու համայնքապետ Վարդգես Սամսոնյանին ուղղված իր դիմումները: Ի դեպ, երեկ ավագանու նիստին Արման Բաղդասարյանը ներկա էր, եւ նրա հրաժարականի մասին որևէ ակնարկ չի արվել: ՔՊ խմբակցության ղեկավար Քնարիկ Հարությունյանը նիստի կեսից ընդմիջում խնդրեց, որից հետո Արման Բաղդասարյանն այլևս դահլիճ չվերադարձավ։ Նկատենք, որ նա բավականին ակտիվ ավագանու անդամ էր։

Ուշագրավ է, որ նրա գրառմանը հաջորդել է կնոջ գրառումը, որը քաղաքապետարանում  մի քանի ամիս է, ինչ պաշտոն էր զբաղեցնում․«Հարգելի ընկերներ, ուզում եմ տեղեկացնել, որ 2022թ-ի ապրիլի 15-ից սեփական դիմումի համաձայն այլևս չեմ զբաղեցնում Գյումրու համայնքապետարանի աշխատակազմի ծրագրերի և արտաքին կապերի բաժնի Ժ/Պ պաշտոնը»։

Ուշագրավ է նաև, որ նրանց հրաժարականների ֆոնին՝ շրջանառվում է խոսակցություն, որ առաջիկայում հնարավոր է Շիրակի մարզպետի փոփոխության հարցը քնարկվի:

Աղբյուր՝ «Հրապարակ»