«Ամերիաբանկ»-ի «Դարձի՛ր փոփոխությունը» մրցույթը ուսանողներին հնարավորություն է տալիս իրականացնել իրենց անհավանական թվացող գաղափարները. ֆոտոշարք

Երևանում ապրիլի 13-ին կայացավ «Ամերիաբանկ»-ի և VISA վճարային համակարգի կողմից իրականացվող «Դարձի՛ր փոփոխությունը» ուսանողական մրցույթի եզրափակիչ փուլը: Հաղթող թիմը ստացավ 3 մլն ՀՀ դրամ մրցանակ։ 

Մրցույթը մեկնարկել էր 2021թ. դեկտեմբերին: Մրցույթի շրջանակում 4-6 հոգուց կազմված ուսանողական թիմերը պետք է ներկայացնեին նորարարական գաղափարներ, որոնք կարող են փոփոխություն բերել մարդու/հասարակության որևէ խմբի կյանքում, գիտության կամ տնտեսության ոլորտում։

Կարևորելով երիտասարդների ներուժը, գաղափարներն ու զարգացումը` Ամերիաբանկը նրանց հնարավորություն է տալիս հանդես գալ նորարար, արդյունավետ գաղափարներով։ Մրցույթին մասնակցելու առանցքային պայմաններից մեկն այն էր, որ ներկայացվող նախագիծն իրագործվի Հայաստանում 1-2 տարվա ընթացքում՝  3 մլն ՀՀ դրամի շրջանակներում։

Առավելագույն միավորներ ստացած թիմերը եզրափակիչ փուլում ներկայացրին իրենց նախագծերը։

Մրցույթի արդյունքներով հաղթող ճանաչված նախագիծն արժանացավ գլխավոր՝ 3 մլն ՀՀ դրամ մրցանակին։ Եվս հինգ թիմ ստացան խրախուսական մրցանակներ՝ 100,000-ական ՀՀ դրամի չափով։

Հաղթող 16-20 տարեկան երիտասարդների թիմը՝ TakeAR հարթակի անադմներից Վիգեն Խաչատրյանի գլխավորությամբ պատմեց, որ այն ստեղծելու գաղափարը ունեցել են դեռ վաղուց։ Խաչատրյանը, մասնակցելով DigiTec Expo-ի ցուցադրությանը, ծանոթանալով Arloopa հավելվածին, որոշել է նման հարթակ ստեղծել։ Իրենք էլ որոշել են դպրոցական դասագրքերը հագեցնել լրացված իրականությամբ։ 

«Կոնկրետ այս ծրագրով մենք նախատեսում ենք 8-րդ դասարանի մարդ-անատոմիա դասագրքի լրացված իրականության տեխնոլոգիայով հագեցնել և ստանալ թվային լաբորատորիա, որը կլինի աշակերտի հետ՝ անկախ նրանից նա կլինի դպրոցում, թե տանը։ Չնայած դիմել ենք շատ կառույցների մեր գաղափարը ֆինանասավորելու համար, սակայն մինչ օրս մենք այս գաղափարի համար ֆինանասավորում չէինք ստացել։ Շատ ուրախ ենք, որ վերջապես գնահատվեց գաղափարը և հուսով ենք, որ այն իրոք մեծ փոփոխություններ կբերի»,- նշեց Խաչատրյանը։ 

Վերջինիս խոսքով՝ գումարը ներդնելու են հարթակը զարգացնելու մեջ։  Նշում են՝ գումարը կծախսեն մոդելների, ձայնագրությունների պատրաստման, ինչպես նաև պատրաստի մոդելների գնման և իրենց կարողությունների զարգացման վրա։ 

«Ներգրավելու ենք նաև այնպիսի մասնագետների, ովքեր կկարողանան մասնագիտական աջակցություն ցույց տալ ավելի ճշգրիտ մոդելներ ստանալու համար»,- եզրափակեց Խաչատրյանը։

«Ամերիա» կառավարման խորհրդատվական ծառայության ղեկավար Տիգրան Ջրբաշյանը կարևորեց IT ոլորտում հայ երիտասարդների հաջողությունները և ողջունեց այն փաստը, որ նրանք պատրաստ են առաջ նայել և առաջ գնալ։ 

«Այս սերունդը ունի կրթության որակի, կրթության մակարդակի խնդիր, բայց միաժամանակ շատ ավելի բաց է և պատրաստ է առաջ նայել և առաջ գնալ։ Այսպիսի ներդրումները, որոնք ուղղված են երիտասարդության ակտիվացմանը, երիտասարդության կրեատիվ միտքը զարգացնելուն և դեպի փոփոխությունները ուղղելուն, կարծում եմ, շատ կարևոր է մեր ազգի ապագայի համար»,- նշեց նա։

Բանկի Մարդկային ռեսուրսների կառավարման ծառայության Զարգացման և վերապատրաստման բաժնի ղեկավար Վահան Մելքումյանը առանձնացրեց, որ վերջին տարիների ընթացքում 100-ից ավել նախագծեր են իրականացրել երիտասարդների և ուսանողների համար՝ նպատակ ունենալով ոգևորել նրանց, տալ նրանց հնարավորություն զարգացնել իրենց ունակությունները, ռեալիզացնելու իրենց պոտենցիալը։ 

«Մեզ համար կարևոր է, որպեսզի երտասարդները հնարավորություն ունենան իրականացնել իրենց անհավանական թվացող գաղափարները, փոփոխություն բերող մտքերը, և հենց սա է պատճառներից մեկը, որ մենք որոշեցինք, հավատարիմ մնալով մեր առաքելությանը, որն է՝ բարելավել կյանքի որակը, իրականցնել այս հետաքրքիր նախագիծը»,- նշեց նա։

Նախագծերն ուսումնասիրվել և գնահատվել են տարբեր ոլորտների մասնագետներից կազմված ժյուրիի կողմից, որի կազմում էին  «Ամերիա» կառավարման խորհրդատվական ծառայության ղեկավար Տիգրան Ջրբաշյանը, «Ամերիաբանկ»-ի Մարքեթինգի և հաղորդակցության գծով տնօրեն Ռեբեկա Հակոբյանը, «Ամերիաբանկ»-ի Մարդկային ռեսուրսների կառավարման ծառայության Զարգացման և վերապատրաստման բաժնի ղեկավար Վահան Մելքումյանը, «Ամերիաբանկ»-ի Անհատական ֆինանսական ծառայությունների և քարտերի վարչության ղեկավար Էլեն Դանիելյանը,  «Ամերիաբանկ»-ի Ինովացիաների և թվայնացման գծով տնօրեն Արտյոմ Շամցյանը, Կորպորատիվ պատասխանատվության մասնագետ Նազարեթ Սեֆերյանը, «ռեԱրմենիա» հարթակի հոգաբարձուների խորհրդի անդամ Արմինե Մկրտչյանը, Girls in Tech Armenia-ի գործադիր տնօրեն Սեդա Պապոյանը,  Orion Worldwide Innovations Armenia-h համահիմնադիր, տնօրեն Դիանա Արզումանյանը, EPIC ինկուբատորի գործառնությունների և համայնքների հետ կապի մենեջեր Աննա Խաչատրյանը։  

«Ամերիաբանկ»-ը դինամիկ զարգացող ունիվերսալ բանկ է Հայաստանում և դասվում է երկրի ամենախոշոր և կայուն ֆինանսական հաստատությունների շարքին։ 2021թ. գործունեության արդյունքներով Ամերիաբանկը ՀՀ բանկային համակարգի առաջատարն է հիմնական ֆինանսական ցուցանիշներով` ակտիվներով, պարտավորություններով, վարկային պորտֆելով, կապիտալով և զուտ շահույթով: Բանկը տրամադրում է նորարարական բանկային ծառայությունների մեծ փաթեթ` հստակ շեշտադրում կատարելով թվային պրոդուկտների վրա։