Այդ դեպքում՝ Արցախի ո՞ր հատվածն է ԱՀ ՊՆ պատասխանատվության գոտին. հարցեր նախարարին

Հարգելի պարոն նախարար,

1․ Եթե Արցախի Ասկերանի շրջանի Փառուխ գյուղը ըստ ձեր գերատեսչության տարածած մամլո հաղորդագրության "Արցախի Հանրապետությունում Ռուսաստանի Դաշնության խաղաղապահ զորակազմի պատասխանատվության գոտի" է, ապա Արցախի ո՞ր հատվածն է ձեր՝ ԱՀ ՊՆ պատասխանատվության գոտին։ Եթե այդպիսին չկա, այդ դեպքում ի՞նչը կամ ու՞մ է պաշտպանում Արցախի Պաշտպանության նախարարությունը։

 

2․ Ըստ շրջանառվող տեղեկատվության՝ ԱՀ ՊԲ ստորաբաժանումները հետ են քաշվել Փառուխ գյուղի հատվածում իրենց դիրքերից Արցախում ՌԴ խաղաղապահ զորակազմի հրամանով/հորդորով։ Արցախի Հանրապետությունում ՌԴ խաղաղապահ զորակազմը ԱՀ ՊՆ-ի նկատմամբ որևէ վերադաս իրավազորություն չունի, այդ դեպքում ինչու՞ է կատարվել զորակազմի ներկայացուցիչների հրամանը/ հորդորը, հատկապես երբ հետպատերազմյան ընթացքում սա արդեն առաջին դեպքը չէ, երբ մեր դիրքապահները ռուսական կողմի հորդորով հետ են քաշվում իրենց դիրքերից պայմանով, որ ադրբեջանական զինուժն էլ է հետ քաշվելու, բայց արդյունքում թշնամին հետ չի քաշվել, առաջ է եկել և մենք կորցրել ենք մեր դիրքերը։ Եթե նման հրաման/հորդոր չի եղել, գրողը տանի, ԻՆՉՈՒ՞ ԵՆ ՊԲ ՍՏՈՐԱԲԱԺԱՆՈՒՄՆԵՐԸ ՀԵՏ ՔԱՇՎԵԼ ՄԵՐ ԴԻՐՔԵՐԻՑ։

 

3. 44-օրյա պատերազմից հետո անցել է 15 ամիս։ 15 ամիսների ընթացքում թշնամին անընդհատ դիմել է ամենատարբեր հանցավոր գործողությունների, սադրանքների, դիվերսիաների, կրակի տակ պահել մեր դիրքերն ու բնակավայրերը, առևանգել և սպանել մեր զինծառայողներին և քաղաքացիական անձանց։ Այդ ամենը հաշվի առնելով՝ ինչու՞ առ այսօր ամբողջովին ականապատված չէ ադրբեջանական ագրեսիայի և Արցախի Հանրապետության տարածքների օկուպացիայի հետևանքով ձևավորված շփման գիծն իր ողջ երկայնքով, հատկապես առաջնագծի այն հատվածները, որոնք անմիջապես հարում են մեր բնակավայրերին և առավել վտանգավոր են։ Փառուխ գյուղի հատվածում առաջնագծի ականապատ լինելու պարագայում թշնամին այդպես հեշտ ու հանգիստ, պարզապես քայլելով չէր գա-հասնի ու ռազմակալի գյուղը։