«Եղբայրս 30 օր Լարսում է, մեքենայի մեջ են ապրում, սնունդն ահավոր թանկ է»․ ի՞նչ վիճակում են հայ վարորդները

Լարսում այս պահին ձյուն է տեղում, ինչի ավարտից հետո երեկոյան ճանապարհը կարող է բացվել ավտոմեքենաների համար, նախ՝ մարդատարների, հետո՝ բեռնատարների։ Այս մասին NEWS.am-ի հետ զրույցում ասաց Ռուսաստանում ՀՀ դեսպանությանը կից մաքսային կցորդ Արամ Թանանյանը։ Նրա խոսքով՝ երեկ՝ ճանապարհի բացվելուց հետո մոտ 200 բեռնատար եւ մոտ 300 մարդատար ավտոմեքենաներ կարողացել են շարժվել Ռուսաստանի կողմից։

«Այս պահի դրությամբ 3500–ից ավելի բեռնատար կա կուտակված ճանապարհին, խցանումը հասնում է 120 կմ երկարության։ Մարդատար մեքենաներից շատ քչերն են տեղում սպասում, մինչեւ կբացվի ճանապարհը, շատերը գնում են հյուրանոցներ, ու երբ ճանապարհը բացվում է, վերադառնում են»,- նշեց Թանանյանը։

Թանանյանի խոսքով՝ ձնամաքրման աշխատանքներն իրականացնում է վրացական կողմը։ «Ամենայն հավանականությամբ, երեկոյան՝ մինչեւ ժամը 7-8-ը, ճանապարհը բացը կլինի մեքենաների համար։ Առաջինը ճանապարհը կբացվի մարդատար մեքենենարի համար, որ խցանումները մեծ չլինեն, հետո արդեն բեռնատարների»,- ընդգծեց Արամ Թանանյանը։

NEWS.am-ի հետ զրույցում Լարսի անցակետով երկու օր առաջ անցած մի բեռնատարի վարորդ, որը խնդրանքով անունը չենք հրապարակում,  պատմեց, որ խցանման մեջ հայտնված բեռնատարները կարողանում են տաքացնել, սակայն սննդի մասով դժվարություններ են առաջանում։

«Եղբայրս 30 օր է՝ այնտեղ է, չի կարողանում առաջանալ, ձյունն ահավոր է։ Իրավիճակն աղետալի է։ Մոտակա խանութներ չկան, շրջիկ ավտոմեքենաներ են գալիս, որոնք սնունդ են վաճառում։ Հացը գնում են 25 ռուբլիով, վաճառում՝ 70 ռուբլիով, երշիկի կիլոգրամն արժե 300 ռուբլի, մեզ վաճառում են 700 ռուբլիով, ծխախոտն են շատ թանկացրել, որովհետեւ գրեթե բոլոր վարորդներն էլ ծխում են։ Կարճ ասած՝ մեքենայի մեջ են ապրում»,- պատմեց քաղաքացին։

 Քաղաքացին դժգոհեց նաեւ վրացական մաքսատան աշխատակիցների վերաբերմունքից։ «Վրացական մաքսատան աշխատակիցները մեզ ասում են՝ ի՞նչ հիմնավորմամբ եք գնում՝ մինչդեռ մեզ նման հարց տալու իրավունք ունի միայն ռուսական մաքսատան աշխատակիցը»,- դժգոհեց քաղաքացին։

Հիշեցնենք, որ մարտ ամսվա սկզբից Լարսի ճանապարհը եղանակային պայմանների պատճառով պարբերաբար փակվում է բոլոր տեսակի ավտոմեքենաների համար։ Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից այսօր՝ մարտի 24-ին, հայտնել էին, որ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։ Մի քանի ժամ անց, սակայն, ճանապարհը կրկին փակվել է բոլոր տեսակի մեքենաների համար։