Մարտական հենակետում մահացած հայտնաբերված զինծառայողը սոցիալապես անապահով ընտանիքից էր

Նախօրեին մարտական դիրքում հրազենային մահացու վիրավորմամբ հայտնաբերված զինծառայող Ալբերտ Սիրոյանն Արարատի մարզի Վարդաշեն համայնքից էր, սոցիալապես անապահով ընտանիքից։

«Հայրը հիվանդ էր, տարիներ առաջ է մահացել։ Ալբերտն ու ավագ եղբայրը մոր խնամքին էին մնացել։ Եղբայրն ամուսնացած է, ինքն էլ մորն օգնում էր՝ հող էին մշակում»,-«Փաստինֆո»-ի հետ զրույցում ասաց Վարդաշենի նախկին համայնքապետ Գևորգ Բարխոյանը։

Ինչպես նշեց Բարխոյանը, Ալբերտը բանակ էր զորակոչվել մեկ տարի երեք ամիս առաջ։

Զինծառայող Սիրոյանի դին հայտնաբերվել է 2022թ. մարտի 16-ին՝ ժամը 21:10-ի սահմաններում, ՀՀ ՊՆ N զորամասի պահպանության տեղամասի մարտական դիրքում՝ կզակի շրջանում ստացած հրազենային վնասվածքով։ ՔԿ հաղորդագրության համաձայն՝ վնասվածքը պատճառվել է հենց զինվորին ամրակցված «ԱԿ-74» տեսակի ինքնաձիգից։ ՔԿ-ի վարկածով՝ զինվորն ինքնասպանություն է գործել ու քրեական գործ է հարուցվել նրան ինքնասպանության հասցնելու հատկանիշներով՝
ՀՀ քրեական օրենսգրքի 360.1-րդ հոդվածի 2-րդ մասի 3-րդ կետով։