Դատավորին ասում են՝ այնպես գործիր, որ քո որոշումը չհակադրվի իշխող ուժի ցանկություններին. Բախշիյանի պաշտպան. Տեսանյութ

Վերաքննիչ դատարանում դատավոր Բորիս Բախշիյանի կալանքի դեմ բողոքի քննությունը հետաձգվեց, այն տեղի կունենա մարտի 14-ին, ժամը 15.15-ին, պատճառը մեղադրող դատախազի բացակայությունն է։ Այս մասին դատարանի մոտ լրագրողների հետ զրույցում ասաց Բախշիյանի փաստաբան Արսեն Սարդարյանը, հաղորդում է News.am-ը։ 

Նրա խոսքով, դատախազը հայտնել էր, որ մասնակցում է դատախազության կոլեգիայի նիստին, ինչպես նաև չի ստացել վերաքննիչ բողոքը. «Ես գտնում եմ, որ այստեղ ակնհայտ երևում է դատախազության վերաբերմունքն այս գործի նկատմամբ, ինչպես կարելի է կոլեգիայի նիստն ավելի բարձր գնահատել, քան անձի ազատության իրավունքը: Ինչ վերաբերում է բողոքը չստանալու հանգամանքին, ապա երկրորդ անգամ է դատական նիստը հետաձգվում. նախորդ նիստը նշանակվել էր փետրվարի 28-ին, բայց մենք այդ մասին ծանուցվել ենք մարտի 2-ին. հավանաբար, փոստը ուշ է հասցրել ծանուցումը։

Մարտի 2-ին ծանուցվելով բողոքի քննության առկայության մասին՝ ինչո՞ւ դատախազը ժամանակ չի տրամադրել այդ բողոքին ծանոթանալու: Նրա համար մեկ զանգ էր պետք դատարանի կազմի հետ կապվել ու խնդրել, որ բողոքն ուղարկեն իրեն։ Այս վարքագիծը ցույց է տալիս, որ դատախազությունն ամեն գնով փորձում է Բորիս Բախշիյանին պահել կալանքի տակ», - ընդգծեց պաշտպանը։

Արսեն Սարդարյանն ասաց, թե Բորիս Բախշիյանի գործն օրինակ է՝ ցույց տալու, որ եթե դատավորն անկախ է աշխատում, անաչառ է, իր որոշումները նախապես չի համաձայնեցնում ինչ-որ անձանց հետ, չի կաշկանդվում քաղաքական ենթատեքստերով կամ ենթադրություններով, ապա նրա նկատմամբ կիրականացվի այնպիսի գործընթաց, որ դատավորի աթոռից կհայտնվի կալանավորի աթոռին. «Ուզում են որ դատավորը կաշկանդված լինի նաեւ ենթադրությամբ: Այսինքն եթե դու գործ ունես քո վարույթում եւ գտնում ես, որ կարող է այդ որոշումը դատախազության սրտով չլինի, նաեւ իշխող քաղաքական ուժի, ուրեմն այնպես գործիր, որ քո որոշումը չհակադրվի դատախազության եւ քաղաքական ուժի ցանկություններին: Հակառակ դեպքում քո նկատմամբ կիրականացվի այնպիսի գործընթաց, որ դատավորի աթոռից կնստես կալանավորի աթոռին, այսինքն կհայտնվես ՔԿՀ-ում»,-ասաց նա:

Ավելի վաղ NEWS.am-ը հայտնել էր, որ Երևան քաղաքի ընդհանուր իրավասության դատարանը` նախագահությամբ դատավոր Դավիթ Արղամանյանի, որոշում էր կայացրել կալանավորել Սյունիքի մարզի ընդհանուր իրավասության դատարանի դատավոր Բորիս Բախշիյանին, որը մեղադրվում է անձին ակնհայտ ապօրինի կալանավորելու համար, որն առաջացրել է ծանր հետևանքներ:

Նշենք, որ հունվարի 31-ին Բարձրագույն դատական խորհրդին ՀՀ գլխավոր դատախազի կողմից ներկայացվել էր երկու միջնորդություն՝ Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում հարուցելու վերաբերյալ համաձայնություն տալու մասին և դատավորին ազատությունից զրկելու վերաբերյալ համաձայնություն տալու մասին։

Խորհուրդը միաձայն որոշել էր ներկայացված երկու միջնորդությունը բավարարել:

Փետրվարի 16-ին Բորիս Բախշիյանի նկատմամբ ընտրված խափանման միջոց կալանավորումը գրավով փոխարինելու վերաբերյալ պաշտպանական կողմի ներկայացրած միջնորդությունը մերժվել է։

Մանրամասները՝ News.am-ի տեսանյութում