Գերու հարազատն այսօր հեռախոսակապ կհաստատի Բաքվում գտնվող եղբոր հետ

Խծաբերդում գերեվարված 62 զինծառայողներից 30-ը շուրջ 15 ամիս է, ինչ գտնվում են թշնամի երկրում։ Հարազատները չգիտեն, թե երբ կվերադառնան նրանք, տեղեկություններն ստանում են Կարմիր Խաչի միջոցով ու այսօր էլ ակնկալում են, որ կապ կհաստատեն։

Արթուրը (անունը փոխված է հայ ռազմագերու շահերից ելնելով՝ հնարավոր նույնականացումից խուսափելու համար) Շիրակի մարզից է։ 2020թ․ դեկտեմբերի 16-ին Խծաբերդի հատվածում գերեվարված պահեստազորայինների թվում նաև նրա եղբայրն էր։ Նրա փոխանցմամբ՝ գերությունից վերադարձ գրեթե բոլոր շիրակցիների հետ մտերմացել է։ Թեկուզ 2021թ․ փետրվարից պարբերաբար կարողանում են կապվել եղբոր հետ, բայց հայրենիք վերադարձած տղաներից ևս Արթուրը փորձել է եղբոր վիճակից տեղեկանալ։ «Վերադարձածներից երեքը իր հետ հենց նույն խցում են եղել։ Դե, իհարկե, մանրամասներ չեն պատմում, բայց հանգստացնում են, ասում են, որ առողջական վիճակը նորմալ է»,-«Փաստինֆո»-ի հետ զրույցում ասել է եղբայրը։

Կարմիր խաչի միջոցով մոտավորապես ամիսը մեկ պարբերությամբ հարազատները կարողանում են հեռախոսային կապով խոսել տղաների հետ, նաև նամակներ են փոխանցում։ Արկադին ասում է՝ տեսազանգով երբևէ չեն խոսել, բայց տեսաուղերձներ՝ դարձյալ Կարմիր խաչի աշխատակիցների միջոցով, փոխանցում են միմյանց։

«Վերջին անգամ եղբորս հետ խոսել ենք փետրվարին, չեմ հիշում կոնկրետ օրը, բայց անցած ամսին էր։ Պետք է որ այսօր էլ խոսենք։ Անհամբեր սպասում ենք»,-ասաց Արթուրը՝ հույս հայտնելով, որ տղաները օր առաջ հայրենիք կվերադառնան։

Հիշեցնենք, որ 2020թ․ դեկտեմբերի 16-ին հայտնի էր դարձել, որ կապը կորել է Արցախի Խծաբերդ և Հին Թաղեր գյուղերի ուղղությամբ տեղակայված մի քանի մարտական դիրքերի անձնակազմերի հետ։ Կարճ ժամանակ անց պարզվել էր, որ Խծաբերդի դիրքեր մեկնած շիրակցիների խումբը՝ 62 պահեստազորային, գերեվարվել է։ Նրանցից 32-ը հայրենադարձվել են ու տուժող ճանաչվել, իսկ 30-ը դեռ գերության մեջ են։