Պաշտոնյանները բորենիների պես բզկտում են գիտության մարմինը. Նուրբ օրգանական քիմիայի ինստիտուտի աշխատակից

Առաջարկում ենք, որ պետությունը հետ գնի տարածքը կամ համարժեքն առաջարկի, որովհետեւ միանշանակ նման կառույցի շինությունը ինստիտուտին անդառնալի վնաս է հասցնելու։ Այս մասին, այսօր՝ փետրվարի 15-ին, մամուլի ասուլիսի ժամանակ նշեց ԳԱԱ Օրգանական և դեղագործական քիմիայի գիտատեխնոլոգիական կենտրոնի գիտական գծով փոխտնօրեն Ռոբերտ Հակոբյանը՝ անդրադառնալով կենտրոնի տարածքում բազմաբնակարան շենք կառուցելու փաստին:  Հաղորդում է NEWS.am-ը:

«Թող պետությունը հստակ դիրքորոշում հայտնի՝ եթե իրենց պետք չէ ինստիտուտը, թող հիմա էլ փակեն, ոչ թե երկու տարուց, որովհետեւ ընդամենը երկու տարուց ինստիտուտը չի գործի։ Մարդ պետք է անհայրենիք լինի, որ թույլ տա այդտեղ բնակելի սարքել։

Կառավարությունը ներկայացնում է, որ այդ տարածքով ընդամենը մեկ ջրագիծ է անցնում, ինչ խանգարում է կառուցմանը, բայց չի ներկայացնում, որ դա ինստիտուտի բակ է։ Ես անձամբ Վահան Քերոբյանին ասում եմ՝ գիտեք, որ դա ինստիտուտի բակ է, ասում է՝ ես տեղյակ չեմ եղել։ Բա որ տեղյակ չեք եղել, ոնց եք ներկայացրել։ Տարածքին նույնիսկ ծանոթ չեն, ուր մնաց՝ գիտենան, թե հետո ինչ կկատարվի»,-ասաց նա:

Իր հերթին նույն ինստիտուտի գիտաշխատող Արփինե Հարությունյանը նշեց, որ ինստիտուտը մեծ դեր ունի Հայաստանի գիտության ոլորտում եւ պատահական չէ, որ պետության կողմից մեկ տարում 15 դրամաշնորհ է ստացել։

«Պաշտոնյանները փոխանակ օգնեն զարգացնել գիտությունը բորենիների պես բզկտում են գիտության մարմինը։ Պատկերացնում են, թե մարդիկ նստում են մեկ սեղանի մոտ ու գիտություն անում։ Ոչ, գիտությունը տարածք է, ենթակառուցվածքներ են, սարքավորումներ են»,-ասաց նա:

Ավելի վաղ NEWS.am-ը հայտնել էր, որ նախօրեին ինստիտուտի աշխատակիցները բողոքի ակցիա են իրականացրել  ԳԱԱ Օրգանական և դեղագործական քիմիայի գիտատեխնոլոգիական կենտրոնի մոտ՝ ինստիտուտի տարածքում նախատեսված բնակելի շենքի կառուցման դեմ։

Նրանց ձեռքին կային պաստառներ հետեւյալ գրառումներով. «Գիտությունը պետության հիմքն է», «Գիտությունն անվտանգություն է», «Մի վնասեք գիտությանը», «Կա գիտություն, կա ապագա», «Հզոր գիտություն, հզոր Հայաստան» եւ այլն:

Նրանք պահանջել են դադարեցնել շինարարական աշխատանքները, փորձելով պետական մարմինների ուշադրությունը հրավիրել բարձրացրած խնդրին։

Կենտրոնի գիտաշխատողները պնդում են  նույն տարածքում գիտատեխնոլոգիական կենտրոնը և բնակելի շենքն անհամատեղելի են:

Հիշեցնենք, որ դեռ նախորդ տարվա ամռանը Կենտրոոնի աշխատակիցները մի շարք բողոքի ակցիաներ են կազմակերպել կառավարության շենքի դիմաց: