Պուտինը և Մակրոնը վերահաստատել են ԵԱՀԿ Մինսկի խմբի կարևորությունը ղարաբաղյան կարգավորման գործում և նշել ռուս խաղաղապահների դրական դերը

Ռուսաստանի և Ֆրանսիայի նախագահներ Վլադիմիր Պուտինը և Էմանուել Մակրոնը վերահաստատել են ԵԱՀԿ Մինսկի խմբի համանախագահների գործունեության կարևորությունը, այդ թվում՝ տարածաշրջանում հրատապ հումանիտար և սոցիալ-տնտեսական խնդիրների լուծման գործում։

«Լեռնային Ղարաբաղի շուրջ ստեղծված իրավիճակը դիտարկելիս մենք նշել ենք ռուս խաղաղապահների դրական դերը, որոնք ապահովում են հրադադարի պահպանումը և օգնում են խաղաղ կյանք հաստատել», - ասել է Պուտինը Մակրոնի հետ համատեղ ասուլիսում գրեթե 6 ժամ տեւած բանակցություններից հետո։

Ֆրանսիայի նախագահն իր հերթին անդրադարձել է Հայաստանի և Ադրբեջանի միջև առկա հակամարտությանը։ Նա նշել է, որ փետրվարի 7-ի առավոտյան վերադարձվել են 8 հայ ռազմագերիներ, որոնց Ադրբեջանից տեղափոխել են Ֆրանսիայի ճգնաժամային կենտրոնի ինքնաթիռով։

Մակրոնը տեղեկացրել է Եվրոպական խորհրդի նախագահ Շառլ Միշելի, Ադրբեջանի նախագահ Իլհամ Ալիևի և  Նիկոլ Փաշինյանի հետ վերջերս կայացած տեսակոնֆերանսի արդյունքների մասին։

«Մենք հարցեր բարձրացրինք անհայտ կորածների, ռազմագերիների և մի շարք այլ հարցերի վերաբերյալ: Դրանք նույնպես կայունության տարրեր են», - ընդգծել է Ֆրանսիայի նախագահը` ողջունելով ռուս զինվորականների դերը սահմանին Հայաստանի և Ադրբեջանի միջև բարդ ժամանակաշրջանում:

Zham.am