Բաքուն ԵԱՀԿ-ին կոչ է անում պահանջել Հայաստանից դուրս բերել զորքերը Արցախից

ԵԱՀԿ Մինսկի խմբի համանախագահները պետք է Հայաստանից պահանջեն անհապաղ դուրս բերել «օկուպացված» տարածքներից զորքերը: Այս մասին ՌԻԱ Նովոստիին հայտարարել է Ադրբեջանի ԱԳՆ պաշտոնական ներկայացուցիչ Հիքմեթ Գաջիևը:

«...ԵԱՀԿ Մինսկի խմբի նախագահները, միջազգային նորմերին ու սկզբունքներին, որոշումներին ու միջազգային կազմակերպությունների բանաձևերին համապատասխան, պետք է պահանջեն Հայաստանից անհապաղ դուրս բերել զորքերը Ադրբեջանի «օկուպացված» տարածքներից և ստատուս քվոի անհապաղ փոփոխում», - ասաց Գաջիևը:

Հիշեցնենք՝ երեկ՝ հուլիսի 4-ին արցախա-ադրբեջանական հակամարտ զորքերի շփման գծի տարբեր հատվածներում հակառակորդը շարունակել է խախտել հրադադարի պահպանման ռեժիմը: Մասնավորապես, ժամը 11:30-11:35 սահմաններում արևելյան ուղղությամբ ադրբեջանական կողմը կիրառել է 82 միլիմետրանոց ականանետ (4 արկ), նույն հատվածում ժամը 12:45-12:55-ի սահմաններում՝ հաստոցավոր հակատանկային նռնականետ (3 արկ), հարավային ուղղությամբ՝ ժամը 13:35-ին 60 միլիմետրանոց ականանետ (3 արկ), 19:10-ին՝ 60 միլիմետրանոց ականանետ (2 արկ), իսկ 20:20-20:30-ի սահմաններում Ալխանլու գյուղում տեղակայված ռազմակայանից ադրբեջանական զինուժը ՏՌ-107 տիպի համազարկային հրթիռային կայանքներից (5 արկ) կրակ է բացել հարավային ուղղությամբ գործող զորամասերից մեկի հրամանատարական կետի ուղղությամբ՝ 20:48-ին կիրառելով նաև 82 միլիմետրանոց ականանետ (3 արկ):