«Մեր քաղաքացիներն այս գնաճի պարագայում ավելի լավ են ապրում, քան 1-2 տարի առաջ». Քերոբյան

ՀՀ էկոնոմիկայի նախարար Վահան Քերոբյանը համոզված է, որ ՀՀ քաղաքացիներն այս գնաճի պարագայում ավելի լավ են ապրում, քան 1-2 տարի առաջ։ Քերոբյանն իր տեսակետը հայտնեց կառավարության նիստից հետո լրագրողների հետ զրույցում։

Միևնույն ժամանակ Քերոբյանը նշեց, որ իրենք նույնպես շատ անհանգստացած են գնաճի մակարդակով։

 

«Թե՛ ներքին շուկայում, թե՛ ԵԱՏՄ գործընկերների հետ փորձում ենք գործիքներ գտնել, որպեսզի կարողանանք գնաճը զսպել։ Որոշակի ապրանքատեսակների մասով (շաքարավազ, միս) ԵԱՏՄ-ն արտոնյալ մաքսասակագնային քվոտաներ է սահմանել, ինչը հնարավորություն է տալու, որ այդ ապրանքախմբերը զուսպ գնաճ ունենան»,-ասաց Քերոբյանը։

Նրա խոսքով` իրենք աշխատանքներ են տանում Կենտրոնական բանկի և մրցակցության պաշտպանության հանձնաժողովի հետ, որպեսզի իրենց ունեցած գործիքներն օգտագործելով՝ զսպեն գնաճը «հատ–հատ առանձին ապրանքային խմբերում»։

 

Անդրադառնալով իրական տնտեսական աճի այս տարվա ցուցանիշներին` նա նշեց, որ այն 4.5-6 տոկոսի միջակայքում կլինի։