Երևան-Ստամբուլ-Երևան չվերթների մեկնարկը կարող է տրվել մոտ օրերին. Թուրքիայի ԱԳՆ
Անկարան դիտարկում է թուրքական և հայկական ավիաընկերությունների հայտերը Ստամբուլ-Երևան-Ստամբուլ թռիչքների համար։ Որոշումը կարող է կայացվել մոտ օրերս, հայտարարել է Թուրքիայի արտգործնախարար Մևլութ Չավուշօղլուն, գրում է Ռիա Նովոստին։ «Ավիաընկերության հայտերը քննարկվում են Թուրքիայի տրանսպորտի նախարարության և քաղաքացիական ավիացիայի գլխավոր տնօրինության կողմից: Սկզբունքորեն, թուրքական կողմի վերաբերմունքը խնդրին դրական է, առաջիկա օրերին կորոշվի, թե ընկերություններից որը կկարողանա թռչել այս երթուղով»,- լրագրողներին ասել է Չավուշօղլուն ԱՄԷ կատարած այցի ժամանակ, մեջբերում է Anadolu գործակալությունը։ Ավելի վաղ Չավուշօղլուն ասել էր, որ Հայաստանի հետ հարաբերությունները կարգավորելու համար կողմերը շուտով փոխադարձաբար կնշանակեն հատուկ ներկայացուցիչներ։ Չարտերային թռիչքներ կբացվեն նաև Երևանի հետ։
Հայաստանի ԱԳՆ-ն դրական է գնահատել Թուրքիայի արտգործնախարարի հայտարարությունը հարաբերությունների կարգավորման հատուկ ներկայացուցչի նշանակման վերաբերյալ և հաստատել, որ հայկական կողմը կնշանակի նաև երկխոսության հատուկ ներկայացուցիչ, հավելում է Ռիա Նովոստին։
Հետևեք մեզ Facebook-ում