Երևանի տրանսպորտային ցանցի արդիականացումը հետաձգվում է. գործադիրը նոր ժամկետ սահմանեց

Երևանի հանրային տրանսպորտի արդիականացումը հետաձգվում է։ Կառավարությունն այսօրվա նիստում ընդունված որոշմամբ` ծրագրի նոր ժամկետներ է սահմանել։ Արդյունքում 2022թ–ից սպասվող բարեփոխումները հետաձգվում են ևս 3 տարով` մինչև 2025թ–ը։

Բանն այն է, որ նախկինում ընդունված որոշմամբ նախատեսվում էր 2022թ-ի հունիսի 1-ից արգելել Երևանի ներհամայնքային կանոնավոր փոխադրումների երթուղիներում ներգրավված, 10 տարին լրացած ավտոբուսների ու միկրոավտոբուսների շահագործումը։

Բայց հետո կառավարությունում հասկացել են, որ հին տրանսպորտային միջոցների շահագործումն արգելելու պարագայում լրջագույն խնդիրներ կառաջանան Երևանի ներհամայնքային կանոնավոր ուղևորափոխադրումների կազմակերպման գործընթացում և մայրաքաղաքի կանոնավոր ուղևորափոխադրումների ողջ գործընթացը կհայտնվի ձախողման եզրին։

Ուստի որոշվել է մայրաքաղաքի կանոնավոր ուղևորափոխադրումների գործընթացը չխաթարելու և քաղաքացիների անխափան սպասարկումն ապահովելու նպատակով, մինչև նոր շարժակազմերի (ավտոբուս, տրոլեյբուս) ձեռքբերումը, մայրաքաղաքի հասարակական տրանսպորտի հավաքակազմի վերջնական համալրումը և Երևանի հանրային տրանսպորտի նոր երթուղային ցանցի ներդրման գործընթացի ավարտը, հին ավտոբուսների շահագործման ժամկետներն ավելացնել ևս 3 տարով` մինչև 2025թ–ի հուլիս։

Նշենք, որ կառավարության որոշման նախագծում ներկայացված տեղեկանքի համաձայն` երևանյան երթուղիներում այսօր ներգրավված են 249 հատ 2011թ-ի թողարկման «Հիգեր» մակնիշի, 19 հատ 2010-2011թթ-ի թողարկման «Հունդաի» մակնիշի, 91 հատ 2005-2009թթ-ի թողարկման «Բոգդան» և «ՊԱԶ» մակնիշների ավտոբուսներ, ինչպես նաև` մոտ 750 10 և ավելի բարձր տարիքի միկրոավտոբուսներ։

Աղբյուր՝ «Սպուտնիկ Հայաստան»