Կյանքը ցույց տվեց, որ մենք ճիշտ էինք. Ալեքսանյանը՝ Առուշանյանի մեղադրանքի շինծու լինելու մասին
«Առուշ Առուշանյանը հուլիսի 16-ից է գտնվում կալանքի տակ, ու մենք հենց առաջին օրվանից պնդում էինք, որ մենք այստեղ գործ չունենք իրավական գործընթացի հետ, այն մեղադրանքը, որը մեղսագրված է Առուշանյանին, շինծու է, այն ամբողջությամբ կառուցված էր մեկ անձի ցուցմունքի վրա։ Խոսքը վերաբերում է Քարահունջի գյուղապետ Լուսինե Ավետյանին։ Մենք ուղղակի գոռում էինք, որ այդ ցուցմունքը շինծու է»։ Այս մասին այսօր՝ դեկտեմբերի 6-ին, մամուլի ասուլիսի ժամանակ ասաց Առուշ Առուշանյանի պաշտպան Էրիկ Ալեքսանյանը՝ հավելելով՝ կյանքը ցույց տվեց, որ իրենք ճիշտ են։
«Բոլորը հատկապես վերջին դատական նիստի ժամանակ համոզվեցին, որ մենք ճիշտ ենք։ Լուսինե Ավետյանն ասաց, որ ինչ ասել է Առուշանյանի դեմ նախաքննության ժամանակ, սուտ են։ Նա նաև պատճառաբանել է, թե ինչու է ստել՝ մասնավորապես անելով հետևյալ հայտարարությունը՝ «Երբ կինը գտնվում է քրեակատարողական հիմնարկում, Աստծո գոյության մասին մոռանում է»։ Շարունակելով իր պատճառաբանությունը՝ նա հստակ ընդունել է, որ Առուշանյանի դեմ նման մեղադրական բնույթի ցուցմունք է տվել միայն կալանքից ազատվելու համար, քանի որ պայմաններն անտանելի են եղել իր համար, ինքը չէր կարող գտնվել կալանավայրում, դրա համար տվել է սուտ ցուցմունքները ազատվելու համար, ինչն էլ եղավ»,-նշեց Ալեքսանյանը։
Պաշտպանի համար անհասկանալի է, թե ինչու է այսօր Առուշանյանը մնում կալանքի տակ․
«Եթե այն ժամանակ պետությունը տեսնում էր խնդիր, որ Առուշանյանը, մնալով ազատության մեջ, կազդի Ավետյանի վրա, բայց ականատես եղանք, որ խոչընդոտ չկա, հիմա Առուշանյանն ինչո՞ւ է կալանքի տակ, ինչո՞ւ մեղադրանքի կողմը չի հրաժարվում մեղադրանքից ու համապատասխան միջնորդություն չի ներկայացնում դատարան, որ Առուշանյանն անհապաղ ազատ արձակվի։ Սա ապացուցում է այն, որ դատախազությունը մնում է հավատարիմ քաղաքական իշխանությանը ծառայելու առաքելությանը»,-հավելեց Ալեքսանյանը՝ միևնույն ժամանակ ընդգծելով, որ Առուշանյանի գործը քննող դատավորը բացառիկ պրոֆեսիոնալ է։
Հետևեք մեզ Facebook-ում