Բրայզան բարձրաձայնել է Փաշինյանի և նրա օլիգարխների երազանքները. «Հայաստանը զգալի ներդրումներ է ստանալու Ադրբեջանի և Թուրքիայի հետ համագործակցության դեպքում»

Նոյեմբերի 26-ին Սոչիում կայացած եռակողմ հանդիպման արդյունքը Ռուսաստանի, Ադրբեջանի և Հայաստանի ղեկավարների կողմից իրենց նախկին պարտավորությունների և պայմանավորվածությունների հաստատումն էր։ Խոսքը վերաբերում է տարածաշրջանային հաղորդակցությունների վերականգնմանը, տնտեսական համագործակցությանը։ Այս մասին Turan.az-ին ասել է Ադրբեջանում ԱՄՆ նախկին դեսպան, ԵԱՀԿ Մինսկի խմբի ամերիկացի նախկին համանախագահ Մեթյու Բրայզան՝ մեկնաբանելով Սոչիի հանդիպման արդյունքները։

«Տրանսպորտային հաղորդակցությունների բացման մասին նախկին պայմանավորվածությունները չեն իրականացվել Հայաստանում ստեղծված քաղաքական իրավիճակի պատճառով։ Փաշինյանը հարձակման է ենթարկվել իր քաղաքական հակառակորդների և առաջին հերթին «ղարաբաղյան կլանի», դաշնակցականների և Միացյալ Նահանգների հայկական սփյուռքի կողմից»,-ասաց Բրայզան։

Նա նաև նշել է, որ Սոչիի հանդիպումը ցույց տվեց, որ Մոսկվան Հարավային Կովկասում գլխավոր խաղացողն է, և նա վճռական է գործընթացը ավարտին հասցնելու հարցում։

Կարեւոր էր նաեւ ՌԴ նախագահի դիտողությունը՝ ուղղված Փաշինյանին, որ տնտեսական կապերի եւ համագործակցության վերսկսման դեպքում Հայաստանը զգալի օգուտներ է ստանալու։

«Հայաստանը զգալի ներդրումներ կստանա Ադրբեջանի և Թուրքիայի հետ համագործակցության դեպքում և կկարողանա ինտեգրվել ոչ միայն տարածաշրջանային, այլև միջազգային նախագծերին»,-ասաց դիվանագետը։

Ադրբեջանի և Հայաստանի միջև սահմանների սահմանազատման և սահմանագծման գործընթաց սկսելու վերաբերյալ կողմերի համաձայնությունը մեծ նշանակություն ունի։ Սա կարող է վերջ դնել սահմանային բազմաթիվ բախումներին ու մարդկային կորուստներին։

«Կարծում եմ, որ ԵԱՀԿ Մինսկի խումբը կարող է էական դեր խաղալ դրա իրականացման գործում։ Ռուսաստանը, ԱՄՆ-ը և Ֆրանսիան այս հարցում պետք է միասնական դերակատարում ունենան։ Ինչ վերաբերում է դեկտեմբերի 15-ին Բրյուսելում կայանալիք հանդիպմանը, ապա Եվրամիությունը պետք է իր դրական դերը խաղա արդեն իսկ ձեռք բերված պայմանավորվածությունների խթանման և իրականացման գործում։ Սա նաև շանս է Ֆրանսիայի համար ապացուցելու, որ օբյեկտիվ խաղացող է և միակողմանի, հայամետ դիրքորոշում չի ցուցաբերում»,- ընդգծել է Բրայզան։

Zham.am