Վերահսկողություն իրականացնելու են թե՛ տեսչական մարմինները, թե՛ ոստիկանությունը. Անահիտ Ավանեսյանը՝ նոր սահմանափակումների մասին

Առողջապահության նախարար Անահիտ Ավանեսյանն այսօր խորհրդարանում լրագրողների հետ զրույցում անդրադարձավ հունվարի 1-ից ՀՀ-ում նախատեսվող սահմանափակումներին՝  հանրային վայրեր այցելելիս պետք է ներկայացնել պատվաստման թերթիկը կամ ՊՇՌ թեստի բացասական արդյունքը հավաստող տեղեկանքը, հաղորդում է 168.am-ը:

Ըստ նախարարի, սա արտառոց բան չէ, բազմաթիվ երկրներ արդեն կիրառում են այդ սահմանափակումները, թե՛ հանրային տրանսպորտից, թե՛ այլ ծառայություններից օգտվելու ժամանակ։

«Տեխնիկական առումով այս լուծումները վաղուց իսկ տրված են, և մեր հավելվածն էլ բավականին լավ գործարկվում է, այն նույն կերպ ճանաչելի է բազմաթիվ երկրներում, մեր քաղաքացիները, օրինակ, Փարիզում սրճարանից օգտվելիս նույն կերպ հավելվածի միջոցով հավաստում են իրենց պատվաստված լինելու հանգամանքը։ Այո, նորից պետք է կրկնեմ, որ կորոնավիրուսն անցանկալիորեն ստեղծել է ճնշումներ առողջապահական, տնտեսական համակարգերի վրա, և մեր կողմից կիրառվող միջոցառումներն ուղղված են, որպեսզի մեր երկրում կորոնավիրուսով պայմանավորված համաճարակային իրավիճակը դուրս չգա կառավարելիի շրջանակներից»,- նշեց Անահիտ Ավանեսյանը։

Նա նաև տեղեկացրեց, որ պահպանվում է դիմակների կրման պահանջը, քանի որ ի հայտ են եկել նոր շտամներ, և պետք է շատ աչալուրջ լինել։

«Վերահսկողություն իրականացնելու են թե՛ տեսչական մարմինները, թե՛ ոստիկանությունը, օրինակ, դրսում դիմակի կրման վերահսկողության ֆունկցիան դրված է  ոստիկանության վրա, բայց, օրինակ, դիմակի կրման պահանջը խանութում՝ տեսչական մարմնի։ Նախարարությունն իր լիազորությունների շրջանակներում անելու է հնարավորինը պաշտպանելու քաղաքացիների առողջությունն ու կյանքը։ Մարդը, որը մուտք է գործում ռեստորան կամ սրճարան, ապա տնօրենը կարող է ստուգել նրա պատվաստված լինելու հանգամանքը։ Մեր հավելվածն այս պահին ներառում է  ոչ միայն պատվաստման սերտիֆիկատը, այլև ՊՇՌ թեստի բացասական արդյունքը»,- շեշտեց նախարարը։

Միաժամանակ նա ընդգծեց, որ այս պահին չկա այն հանրային իմունիտետը, որն անհրաժեշտ է, դա 50-60 տոկոսից ավելին է։ Հետևաբար՝ դեռևս կիրառելու են որոշակի գործիքակազմ, որպեսզի ավելի խթանեն պատվաստումները։