Հայտնաբերվել է Տավուշում 65–ամյա տղամարդուն սպանած ենթադրյալ կասկածյալը. Նա սպանվածի համագյուղացին է

Այսօր՝ նոյեմբերի 23-ին, ոստիկանների օպերատիվ-հետախուզական գործողությունների արդյունքում ոստիկանության Տավուշի բաժին են բերման ենթարկել Տավուշի մարզի գյուղերից մեկի բնակիչ, 39-ամյա Համբարձում Օ.-ին: Shamshyan.com-ի հաղորդմամբ, վերջինս կասկածվում է հոկտեմբերի 15-ին համագյուղացի, 65-ամյա Խաչատուր Ս.-ին սպանելու մեջ: Համբարձում Օ.-ն քննիչի որոշմամբ ձերբակալվել է: Սպանության հատկանիշներով հարուցված քրեական գործի նախաքննությունը շարունակվում է: Հիշեցնենք, որ հոկտեմբերի 16-ին սպանություն էր տեղի ունեցել Տավուշի մարզում։

Ժամը 09։40-ի սահմաններում ԱԻՆ փրկարար ծառայության 9-11 օպերատիվ կառավարման կենտրոն ահազանգ էր ստացվել, որ Տավուշ-Պառավաքար բնակավայրերի միջտարածքային հատվածում՝ Վազաշեն գյուղի վարչական տարածքի անտառում, առվակի մեջ տղամարդու դի կա։ Հրշեջ-փրկարարները նշված վայրից դուրս էին բերել Տավուշի մարզի Այգեձոր գյուղի բնակիչ՝ 65-ամյա Խաչատուր Սուլյանի դին։ Դատաբժշկի նախնական եզրակացության համաձայն՝ մահացածի մարմնի վրա կար սուր կտրող-ծակող առարկայի հետք, ինչի համար էլ փաստի առթիվ ՀՀ քր.օր-ի 104 հոդվածի 1-ին մասի հատկանիշներով հարուցվել էր քրեական գործ։ Հոկտեմբերի 15-ին, ոստիկանության Բերդի բաժին էր դիմել Այգեձոր գյուղի բնակիչ՝ 86-ամյա Սարգիս Սուլյանը, ով հայտնել էր, որ եղբայրը՝ Խ. Սուլյանը, հոկտեմբերի 13-ին, ժամը 17։00-ի սահմաններում իր ՎԱԶ 2106 մակնիշի ավտոմեքենայով դուրս է եկել տնից և չի վերադարձել։