Փաշինյանը Կապան է մեկնել Տաթեւի ճանապարհով
Ինչպես հայտնի է` երեկ Նիկոլ Փաշինյանը մեկնել է Կապան՝ մասնակցելու Կապանի ՏԻՄ ընտրություններին ՔՊ քաղաքապետի թեկնածու Դավիթ Դանիելյանի հոր հոգեհանգստին։ Կապանից մենք տեղեկացանք, որ Փաշինյանը Կապան է գնացել ոչ թե Գորիս- Կապան միջպետական ավտոճանապարհով, որի Որոտան- Նոր Առաջաձոր հատվածն ադրբեջանական վերահսկողության տակ է հայտնվել, այլ Տաթևի գրունտային` այժմ վերանորոգվող ճանապարհով։
Կապանից «Հրապարակ»-ին ասացին, որ Փաշինյանին շուրջ 20 մեքենա է ուղեկցել, գյուղերից յուրաքանչյուրի խաչմերուկներում ոստիկաններ են կանգնած եղել, որպեսզի հսկեն Փաշինյանի երթևեկությունը, և նրան ոչ ոք տեղի բնակչությունից չմոտենա։
Արձանագրենք, որ ՀՀ վարչապետը խուսափում է Հայաստանի միջպետական ճանապարհից օգտվել, քանի որ վախենում է ադրբեջանցիներից, սակայն միեւնույն ժամանակ վախենում է նաեւ հայերից` թիկնապահների այն քանակը, որն ուղեկցում է նրան, եւ ոստիկանական հսկայական ուժերի հսկողությունը ճանապարհներին, դրա մասին է վկայում։
Եթե Կապան այցելելիս նման նախազգուշական միջոցառումներ են կիրառվում, անիմաստ է ակնկալել, որ նա երբեւէ կայցելի Արցախ: Այսինքն, հենց այս վախն ու տագնապն է պատճառը, որ ուղիղ մեկ տարի ՀՀ վարչապետը չի այցելել Արցախ:
Հետևեք մեզ Facebook-ում