Մեր վերջին հայտարարությունն ուղղված է երկու կողմերին. ԵԱՀԿ ՄԽ ռուսաստանցի համանախագահ
ԵԱՀԿ Մինսկի խմբի համանախագահները խորը ափսոսանք են տածում վերջին շրջանում շփման գծում իրադարձությունների հետ կապված:
Ինչպես հաղորդում է «ԱՊԱ» գործակալությունը, այս մասին հայտարարեց ԵԱՀԿ Մինսկի խմբի ռուսաստանցի համանախագահ Իգոր Պոպովը:
Դիվանագետը նշեց, որ Ադրբեջանի նախագահի և պաշտպանության նախարարի հետ քննարկել է վերջին օրերին լարվածությունը շփման գծում:
«Շատ մտահոգ ենք հրադադարի ռեժիմի լուրջ խախտումներով համանախագահների տարածաշրջան այցի նախօրեին: Մենք պետք է անենք ամեն ինչ, ինչ մեր ուժերում է, որպեսզի նման իրադարձություններ նորից չկրկնվեն: Մենք կանենք մեզանից կախված ամեն բան լարվածությունը նվազեցնելու համար», - ասաց նա:
Պոպովը նաև նշեց, որ վերջին հայտարարությունը հասցեագրված է երկու կողմերին, և հիմնական ուղերձն ուղղված է լարվածության նվազեցմանը շփման գծի երկայնքով:
Բացի այդ Իգոր Պոպովը նշել է, որ թե՛ Հայաստանի, թե՛ Ադրբեջանի նախագահները հանդես են գալիս խաղաղ բանակցությունների շարունակման օգտին:
«Ե՛վ Բաքվում, և՛ Երևանում մենք քննարկումներ ենք անցկացրել քաղաքական երկխոսության վերսկսման առնչությամբ: Այդ քննարկումների արդյունքներով կարելի է գալ եզրակացության, որ երկու երկրների նախագահները հանդես են գալիս խաղաղ բանակցությունների շարունակման օգտին», - ասաց Պոպովը:
Zham.am
Հետևեք մեզ Facebook-ում