Ինչ եղավ հետո, երբ Անահիտ Ավանեսյանն իրեն Նիկոլ Փաշինյանի տեղ դրեց

ՀՀ կառավարության այսօրվա նիստում Նիկոլ Փաշինյանն ընդունեց, որ «Հրապարակի» պնդումը, որ վարչապետի աթոռին նստողը «կռուտիտի» եւ արգելված գծեր հատելու հարցում անգերազանցելի է, իրական է: Ավելին՝ Նիկոլ Փաշինյանը շատ թափանցիկ ակնարկեց, որ Հայաստանում միայն ինքը պիտի «կռուտիտ» անի: Ահա թե ինչպես դա եղավ:

Երբ առողջապահության նախարարի աթոռին նստող Անահիտ Ավանեսյանն ասաց, որ կորոնավիրուսի դեմ պատվաստումները դանդաղ են ընթանում, քանի որ որոշ մարդիկ բացասական, հակապատվաստումային ինֆորմացիոն դաշտ են ձեւավորում ու քարոզչություն անում, Նիկոլ Փաշինյանը՝ պայթեց, պահանջեց չդժգոհել ու արդյունք ապահովել, ուժայիններին էլ հանձնարարեց՝ զբաղվել հակաքարոզչության հեղինակներով, ոտքի վրա հորինեց, թե պատվաստումների օգտին շարժում է ձեւավորվում: Չենք զարմանա, եթե «հեղափոխության պահապաններ» հայկական ահաբեկչական կազմակերպության օրինակով, թավշյաները ձեւավորեն «պատվաստումների վկաներ» ոչ պակաս ագրեսիվ ու ահաբեկչական կառույց: 

Բայց ի՞նչ արեց Անահիտ Ավանեսյանը, որ զայրացրեց Նիկոլ Փաշինյանին: Անահիտն իրեն Նիկոլի տեղ դրեց՝ իր անհաջողության համար մեղավոր են բոլորը՝ բացի իրենից: Ու Նիկոլը պայթեց: Երեւի նեղվեց, որ իր նման «կռուտիտի» անգերազանցելի վարպետին որեւէ մեկը գերազանցոմ է, կամ` զայրացավ, քանի որ Հայաստանում միայն ինքը պիտի տրվի «կռուտիտին»: Կամ էլ Նիկոլին դուր չեկավ, որ Անահիտը նրան հիշեցրեց կորոնավիրուսի վերաբերյալ իր իսկ անթույլատրելիության աստիճանի անլուրջ պահվածքը՝ «Կորոնավիրուսն ո՞ւմ շունն է», արտահայտության տեսքով` համաճարակի առաջին փուլում: Իսկ Նիկոլ Փաշինյանը, մեղմ ասած, ծանր է տանում, երբ մատնացույց են անում իր իսկ սխալները:

Աղբյուր՝ «Հրապարակ»