Տանն ասեցի գնում եմ շուկա ի՞նչ բերեմ, ասեցին՝ ամեն ինչ, ցուցակ են տվել. Իգնատի Առաքելյան (տեսանյութ)

ՀՀ գյուղատնտեսության նախարար Իգնատի Առաքելյանն այսօր՝ հունիսի 10-ին, Երեւանի Կասյան փողոցում բացված գյուղատնտեսական շուկայում գնումներ կատարեց: Հաղորդում է NEWS.am-ը:

Լրագրողների հարցին թե ինչ գնումներ է նա պատրաստվում կատարել, նախարարը կես կատակ, կես լուրջ պատասխանեց «Ինձ ցուցակ են տվել։ Տանն ասեցի գնում եմ շուկա ի՞նչ բերեմ, ասեցին ամեն ինչ»։

Չնայած գնումները ծավալուն չէին, այնուամենայնիվ նախարարը գոհ էր երեւում իր կատարած առեւտրից. վարունգ գնելուց առաջ նախ կոտրեց մեկը, փորձեց այն, ապա առանց վաճառականների հետ ապրանքների գինը սակարկելու շարունակեց առեւտուրը՝ գնեց պղպեղ, լոլիկ, կեռաս։

Գնումներ կատարելիս նախարարը հետաքրքրվեց գյուղացիներից թե ինչ տրամադրություն ունեն եւ որքանով է առեւտուրն առաջ գնում։ Վաճառականների պատասխանները տարբեր էին՝ ոմանք դժգոհեցին, թե առեւտուրը լավ չէ, ոմանք էլ այնքան գոհ էին, որ պահանջներ չներկայացրեցին, իսկ նախարարի հարցին թե էլ ինչ կարող են անել վաճառողների համար, վաճառական մի կին պատասխանեց. «Ամեն ինչ էլ լավ է, ասելու, անելու բան չկա»:

Մանրամասները՝ NEWS.am-ի տեսանյութում