Ամասիա համայնքում ո՛չ բերք կա, ո՛չ խոտ. Անասուններին պահելն այստեղ ամենամեծ խնդիրն է

Շիրակի մարզի Ամասիա համայնքում այս տարի ամենամեծ խնդիրը խոտի բացակայությունն է։ Անասունների գլխաքանակն այստեղ մեծ է, սակայն մարդիկ չեն կարողանում պահել դրանց։

«Փաստինֆո»-ի հետ զրույցի ժամանակ Ամասիա համայնքի ղեկավար Ջեմմա Հարությունյանն ասաց, որ այս տարի համայնքում գյուղատնտեսական աշխատանքի հետ կապված վիճակը շատ վատ է։ Ո՛չ խոտ ունեն, ո՛չ էլ բերք։

Ամասիան Շիրակի մարզի այն եզակի համայնքներից է, որտեղ այս տարի ոռոգման հետ կապված խնդիր չի եղել, սակայն եղանակային պայմանների պատճառով, միևնույն է, գյուղի դաշտերը փչացել են։

«Բույսերը սկզբում ցրտահարության ենթարկվեցին, այդ իսկ պատճառով բերք չեղավ։ Մեր շրջանում հիմնականում հացահատիկ, կերային կուլտուրաներ և շատ քիչ կարտոֆիլ է աճում, բայց այս տարի ո՛չ ցորեն կա, ո՛չ գարի։ Անասուններին պահելու համար խոտ էլ չկա, դրան էլ գումարած վարկերը։ Բոլորի վիճակը շատ ծանր է»,-ասաց Ջեմմա Հարությունյանը։

Վերջինս նշեց, որ այսօրվա դրությամբ անասունների իրացում չկա, միսը չի վաճառվում, գլխաքանակով էլ չեն տանում և մնացել է գյուղացու մոտ։

«Մսի գինն իջել է, տավարի միսը 1200 դրամով են տանում, որը շատ էժան է, ցուլերինն էլ 1800 դրամով են տանում։ Գլխաքանակով էլ տանող չկա։ Այդպես սովորաբար եզդիներն են տանում, բայց հիմա չեն երևում, որովհետև Ղարաբաղից շատ անասուններ բերեցին, էլ այստեղի անասունները չեն տանում»,-նշեց Ամասիայի համայնքապետը։

Այս պահի դրությամբ Ամասիայում 10 հազար մանր եղջերավոր անասուն կա և 5400 խոշոր եղջերավոր անասուն։ Բնակիչները, սակայն, չեն կարողանում պահել դրանց։ Համայնքապետը մինչ այս պահը չի լսել, որ կենդանիներ ընկած լինեն, սակայն կարծում է՝ բնակիչները կդժվարանան այդ կենդանիների նույնիսկ կեսին պահել։

Ինչ վերաբերում է փոխհատուցմանը, Ջեմմա Հարությունյանն ասաց, որ ոչ մի փոխհատուցում չեն ստացել. «Ամբողջ մարզը նույն վիճակում է, ինչպե՞ս մարզպետարանում տեղյակ չեն լինի այդ մասին։ Դեռ խնդրի որևէ լուծման առաջարկ չենք ստացել»,-ասաց համայնքապետը։

Աղբյուր` Փաստինֆո