Ոստիկանությունը թաքցնում է ընտրողների լրացուցիչ ցուցակներում ընդգրկված Արցախից տեղահանվածների թիվը
ՀՀ ոստիկանությունը թաքցնում է, թե Արցախից տեղահանված եւ ՀՀ տարածքում բնակություն հաստատած քանի քաղաքացի է դիմում ներկայացրել՝ արտահերթ խորհրդարանական ընտրություններին քվեարկությանը մասնակցելու նպատակով ընտրական լրացուցիչ ցուցակում ընդգրկվելու համար եւ նրանցից քանիսի դիմումն է բավարարվել։
Այսպես, «Փաստինֆո»-ն գրավոր հարցում էր ուղարկել ՀՀ ոստիկանություն՝ պարզելու, թե ՀՀ քաղաքացու անձնագիր ունեցող Արցախից տեղահանված քանի քաղաքացի է ընդգրկվել ընտրողների ցուցակներում եւ քանիսն է ունեցել ընտրելու իրավունք։ Խնդրել էինք նաեւ տեղեկացնել, թե ընդհանրապես ընտրողների ցուցակներում ընդգրկվելու քանի դիմում էին ստացել ու քանիսն է մերժվել եւ ինչ հիմնավորմամբ։
«ՀՀ ազգային ժողովի արտահերթ ընտրություններին մասնակցելու համար Արցախից տեղահանված քաղաքացիների՝ ընտրացուցակներում ընդգրկված լինելու, ինչպես նաև Արցախի Հանրապետությունում հաշվառված անձանց կողմից ընտրողների լրացուցիչ ցուցակներում ընդգրկվելու վերաբերյալ ներկայացված դիմումների ընդհանուր թվաքանակի, բավարարված կամ մերժված դիմումների քանակի մասով առանձին հաշվառումներ չեն տարվել, քանի որ ընտրողների լրացուցիչ ցուցակներում ընդգրկելու վերաբերյալ դիմումներ ընդունվել են ինչպես Անձնագրային և վիզաների վարչությունում, այնպես էլ՝ ԱՎՎ տարածքային անձնագրային ծառայություններում՝ հաշվառում ունեցող մյուս անձանց դիմումների հետ միասին։ Միաժամանակ տեղեկացնում ենք, որ Արցախի Հանրապետության հաշվառում ունեցող անձանց կողմից ընտրողների լրացուցիչ ցուցակներում ընդգրկվելու վերաբերյալ դիմումները քննարկվել են «ՀՀ ընտրական օրենսգիրք» սահմանադրական օրենքի և «Հայաստանի Հանրապետության քաղաքացիության մասին» օրենքի համատեքստում»,- նշված է ՀՀ ոստիկանության անձնագրային և վիզաների վարչությունից ստացված պատասխանում։
Այլ խոսքով՝ պատկան մարմինները խուսափում են տեղեկատվություն տրամադրել քվեարկությանը մասնակցելու նպատակով արցախցիների կողմից ներկայացված դիմումների վերաբերյալ, ընդ որում, դա այն դեպքում, երբ դեռևս մինչ ընտրությունների օրը բազմիցս բարձրաձայնվել է, որ արցախցիների՝ քվեարկությանը մասնակցելուն խոչընդոտելու և ներկայացված դիմումներն անհիմն մերժելու, խտրական մոտեցում ցուցաբերելու դեպքերի մասին։
Մասնագիտական հանրությունը մտահոգություն էր հայտնել առ այն, որ արցախցիների՝ քվեարկությանը մասնակցելուն խոչընդոտում են՝ կանխազգալով, որ վերջիններիս ձայներն ուղղված չեն լինի իշխող ուժին։ Փաստաբան Անահիտ Սարգսյանը, անդրադառնալով վերոգրյալ խնդրին, «Փաստինֆո»-ի հետ զրույցում հայտնեց, որ դա իրականացվել է ընտրությունները ոչ օրինական անցկացնելու համար, քանի որ ենթադրվում է, որ արցախցիները չէին քվեարկի իշխող ուժի օգտին, ուստի՝ նրանց համար հակաօրինական սահմանափակումներ մտցվեցին։
«Գիտենք, որ արցախցիներն ունեն նույն ՀՀ քաղաքացու՝ կապույտ անձնագիրը, այսինքն՝ որևէ տարբերություն չկա և որևէ օրենսդրական սահմանափակում չկա, առավել ևս, խոսքը վերաբերում է այն արցախցիներին, որոնք ունեցել են Արցախում բնակության վայր և որոնք բնակության վայրը նոյեմբերի 9-ի փաստաթղթով հանձնվել է ադրբեջանցիներին։ Այսինքն՝ մարդիկ չունեն բնակության վայր Արցախում, եկել են, բնակվում են ՀՀ-ում և ունեն ՀՀ քաղաքացու անձնագիր »,- նշեց Սարգսյանը՝ հավելելով, որ սահմանափակումներն անհիմն էին և Վարչական դատարանում արդեն գործեր կան այդ հարցի վերաբերյալ։
Սարգսյանը հայտնեց, որ ընտրություններին նախորդող օրերին տեղեկատվություն են ստացել, որ մեկին գրանցում են, մյուսին՝ ոչ, այսինքն՝ խտրական մոտեցման մասին ահազանգեր են ստացվել։ Ինչ վերաբերում է ՀՀ ոստիկանության տրամադրած պարզաբանմանը, Սարգսյանը նշեց, որ Ոստիկանությունը չի կարող տեղեկություն չունենալ, իրենք պարտավոր են տեղեկություն ունենալ, թե քանի արցախցի է դիմել, քանի դիմում է մերժվել և ինչ հիմքով։
«Բնականաբար՝ ինչ-որ բան են թաքցնում։ Կամ իսկապես այնքան անպատասխանատու վիճակ է, որ ոչ մի հաշվառում չեն իրականացնում, ինչպես՝ յուրաքանչյուր ոլորտում։ Տեր-տնօրեն չկա, քաոսային վիճակ է, ոչ թե պետություն է, այլ՝ անիշխանություն է տիրում։ Այնպես, որ շատ հնարավոր է, որ հենց այդ էլ լինի» ,- նշեց Սարգսյանը։
Հետևեք մեզ Facebook-ում