Կութի կովերի հարցով բանակցությունները շարունակվում են

«Հրապարակ»-ը գրում է. «Պաշտպանության նախարարությունը երեկ հաղորդեց, որ հունիսի 7-ի առավոտյան հայ-ադրբեջանական սահմանագծի՝ Գեղարքունիքի մարզի Վերին Շորժա գյուղի սահմանային հատվածում ադրբեջանական զինված ուժերը հերթական անգամ փորձել են ինժեներական աշխատանքներ կատարել։ «Աշխատանքներն անհապաղ դադարեցնելու եւ ինժեներական տեխնիկան հեռացնելու պահանջով հայկական ստորաբաժանումներն իրականացրել են հակազդման գործողություններ, ինչից հետո աշխատանքները դադարեցվել են, տեխնիկան հեռացվել է սահմանի ադրբեջանական հատված»,- տեղեկացնում է ՊՆ-ն։

Մեր տեղեկություններով, որոնք ստացանք Վերին Շորժա գյուղի բնակիչներից, ադրբեջանցիներն առավոտից, իրոք, ինչ-որ ինժեներական աշխատանքներ են իրականացրել: «Առավոտը աշխատանքներ արել են, հիմա չեն անում, բայց դադարեցնելու պատճառը չգիտենք՝ հայկական կողմի՞ պահանջով է եղել, թե՞ իրենք էլ չեն ուզել շարունակել»,- ասաց մեր աղբյուրը: Կութ համայնքի ղեկավար Սիմա Չիտչյանն էլ երեկ առավոտից խառնաշփոթի մեջ էր: Ասում է՝ անընդհատ մարդիկ են գալիս-գնում՝ մարզպետարանից, Վարդենիսի քաղաքապետարանից, «կորպուսից», համագյուղացիներ: «Գրասենյակն առավոտից լիքն է: Անասունների հարցով բանակցություններ են ընթանում առավոտից: Կներեք, չեմ կարող շատ խոսել: Թուրքերի հետ բանակցություն է եղել, բայց արդյունքը մեզ դեռ չեն ասել: Դեռ ոչինչ չգիտենք»: Բայց ազերիները գոնե ընդունե՞լ են, որ իրենք են տարել: «Դա էլ չգիտենք, դե, քշել-տարել են, կարող է եւ չընդունեն»,- ասում է Սիմա Չիտչյանը: 

Կիրակի օրը մենք գրել էինք, որ ադրբեջանցիները կրակահերթեր են արձակել հովվի ուղղությամբ, գնդակը կպել է ձիու ոտքին, եւ ամբողջ հոտը թշնամին գողացել է։ Ըստ գյուղապետի, առեւանգել են 80 գլուխ անասուն՝ 12 ցուլ, մնացածը՝ կովեր: Կովերի մի մասին անմիջապես մորթել են: «Այստեղից այնքան մոտիկ է, երեւում է, որ նայում ենք, տեսնում ենք մորթած անասունները»,- նշեց համայնքի ղեկավարը»։