Երեք պատերազմների մասնակցին հրաժարվում են անվճար բուժօգնություն տրամադրել

Hraparak.am-ը գրում է. ««Գիտակցական ողջ կյանքս ծառայել եմ հայրենիքիս ու պետությանս, բայց նվաստացումից բացի ոչինչ չեմ ստացել»,-ասում է արցախյան երեք պատերազմների մասնակից Ղարիբ Բուդաղյանը: Պատերազմները քայքայել են 59-ամյա տղամարդու առողջությունը, իսկ 44-օրյա կռվում կոնտուզիա է ստացել: «Երբ Նիկոլ Փաշինյանը վերջին պատերազմի ժամանակ զինվորագրվելու կոչ արեց, ես արդեն Արցախում էի: Նախորդ երկուսի ժամանակ էլ հրավերի չեմ սպասել: Մի բան գիտեմ՝ եթե հայրենիքն իմ կարիքն ունի, ինձ կոչեր ու կանչեր պետք չեն. գնում եմ՝ առանց հետ նայելու»:

Պատերազմներից հիվանդությունների փունջ է վաստակել կամավորականը: Դրանք հաճախ են զգացնել տալիս. որովայնը ժամանակ առ ժամանակ ուռչում է, շնչելը դժվարանում է, որովհետեւ թոքերը ջրի մեջ են, կոնտուզիայի պատճառով չի կարողանում ազատվել սուր գլխացավերից… Ցավի հաճախակի նոպաները զսպելու համար օրը մի քանի անգամ ցավազրկող հաբեր է ընդունում, միայն թե հիվադանոցների դռները չընկնի ու հերթական անգամ չնվաստանա:

«Բայց ցավազրկող ու հանգստացնող հաբերով ինչքա՞ն կարող եմ ձգել: Օրերս այնքան վատացա, որ ստիպված դիմեցի բժիշկներին: Սկզբում եղա Էջմիածնի հիվանդանոցում, հետո՝ «Էրեբունի»-ում: Երկուսում էլ ներկայացրի զինգրքույկս, որտեղ մանրամասն գրված է, թե որտեղ, ինչ ժամկետում եւ ում հրամանատարության տակ եմ ծառայել: Բայց զարմանքից քարացա, երբ երկու հիվանդանոցներում էլ ասացին, թե զինգրքույկս ժամկետն անց է: Ասում եմ՝ հարգելիս, սա զինգրքույկ է, ամեն անգամ չես տանի զորամասի հրամանատարին տաս, որ գրի՝ մասնակցել է պատերազմին: Կամ՝ հո խոտ բարձելու տեղեկանք չի՞, որ օրական գնամ վերցնեմ… Իսկ իրականությունն այն էր, որ չցանկացան ընդունել պետպատվերով, բայց եթե կարողանայի վճարել, կսկսեին բուժումս»:

Ղարիբ Բուդաղյանն անվճար կամ գոնե 50 տոկոս զեղչով բուժվելու ակնկալիք է ունեցել: Այդ վստահությունն իրեն ներշնչել է Նիկոլ Փաշինյանը՝ հայտարարելով, թե պատերազմին մասնակցածների բուժման ծախսերը պետությունն իր վրա է վերցնում: 

«Փաշինյանն ասում էր՝ ընտանիքի անդամներն էլ կարող են անվճար բուժվել: Ի՞նչ ընտանիքի մասին է խոսքը, երբ կռվածիս բանի տեղ չեն դնում: Պետությունն ինչի՞ է խաբում. ասում է՝ անվճար կբուժեմ, գնում-հասնում ես, պարզվում է՝ պետք է վճարես: Մենք անշահախնդիր մեր կյանքն ու առողջությունը դրեցինք, պետությունն էլ գոնե իր զինվորին ու քաղաքացուն տեր կանգնի»,- ասում է Բուդաղյանը:

Կամավորականը դիմել է նաեւ «Աստղիկ» բուժկենտրոն: Այստեղ էլ զննել են, տեսել են, որ թոքերը ջրի մեջ են, առաջարկել են դիմել այլ բուժհաստատություն: «Երրորդ հարկում զննեցին, բժիշկն ասաց, որ իրենց հիվանդանոցում այդ մասնագետը չունեն, պետք է այլ հիվանդանոց տեղափոխել: Ասացի՝ մի բան արեք, չի կարողանում շնչել, քայլել, պատասխանեց՝ տեղ չունենք: Հարցնում եմ՝ խնդիրը ո՞րն է, որ չեք ընդունում, ասաց՝ թերապեւտիկ բաժանմունք չունենք»,- պատմեց Ղարիբ Բուդաղյանին հիվանդանոցից հիվանդանոց ուղեկցած ազգականը:

Ի նշան բողոքի՝ Բուդաղյանի հարազատները որոշել են նրա հետ ակցիա անել առողջապահության նախարարության մոտ, բայց մարտիկն առարկել է. «Մարմնիս փրկության համար արժանապատվությանս դեմ չեմ գնա»»։