Պատգամավորի թեկնածուները հայերենի թեստ են հանձնել. 5 հոգուց միայն մեկն է հաղթահարել թեստավորման փուլը

Մայիսի 30-ին Ազգային ժողովի պատգամավորի թեկնածու առաջադրվել ցանկացող 5 քաղաքացի ՀՀ կրթության, գիտության, մշակույթի և սպորտի նախարարությունում հայերենի իմացության ստուգման թեստ է հանձնել:

«5 հոգուց մեկը հիվանդ էր, չի ներկայացել, 4-ից էլ 1-ն է հաղթահարել  թեստավորման փուլը»,- 168.am–ի  հետ զրույցում հայտնեց ՀՀ ԿԳՄՍ նախարարի մամուլի խոսնակ Գեղամ Մելիքբեկյանը։

ԿԳՄՍ նախարարի խոսնակը շեշտեց՝ հայերենի թեստ հանձնում են հայերենին տիրապետելու հանգամանքը հավաստող ավարտական փաստաթղթի բացակայության դեպքում:

Գեղամ Մելիքբեկյանից հետաքրքրվեցինք, թե ովքե՞րն են պատգամավորի վերը նշված 5 թեկնածուները, ո՞ր կուսակցությունից են, սակայն նա ասաց, որ անձնական տվյալ է, չեն կարող հայտնել, միայն թեկնածուների գրավոր համաձայնության դեպքում է հնարավոր անուններ հրապարակել:

ԿԸՀ խոսնակ Հերմինե Հարությունյանն էլ հայտնեց, որ հայերենի թեստ չեն հանձնում պատգամավորի այն թեկնածուները, ովքեր ավարտել են ՀՀ բուհերից մեկը, և դա հանձնաժողովը համարում է իբրև հայոց լեզվի իմացությունը հավաստող փաստաթուղթ:

Դիտարկմանը, այսինքն՝ այլ երկրում սովորած անձի՞նք են թեստ հանձնելու, ԿԸՀ խոսնակը պատասխանեց.

«Ոչ, տարբեր պատճառներ կարող են լինել, թե ինչու այս կամ այն անձը չունի այդ վկայականը կամ տեղեկանքը»:

ԿԳՄՍ նախարարի խոսնակն էլ նկատեց՝ միգուցե մարդը դիպլոմն է կորցրել, և այլն, տարբեր խնդիրներ կարող են լինել:

Հավելենք, որ հարցաշարը կազմված է երեք բաժիններից՝ ուղղագրություն (35%), ուղղախոսություն (35%) և Բառագիտություն (30%):