Դատավորն առաջնորդվել է արդարադատության շահից. փաստաբանը՝ Մանվել Գրիգորյանի դստեր նկատմամբ վարույթ հարուցելու մասին

Ազգային ժողովի նախկին պատգամավոր, ԵԿՄ նախկին նախագահ Մանվել Գրիգորյանի դստեր՝ Արմավիրի մարզի առաջին ատյանի ընդհանուր իրավասության դատարանի դատավոր Նաիրա Գրիգորյանի նկատմամբ կարգապահական վարույթ հարուցելու մասին որոշումը Բարձրագույն դատական խորհուրդը կհրապարակի մայիսի 31-ին։

NEWS.am-ի հետ զրույցում Նաիրա Գրիգորյանի փաստաբան Գուրգեն Գրիգորյանն ասաց, որ կարգապահական վարույթը վերաբերում է դատական գործերից մեկի ժամկետի խախտմանը.

«Ասում են, որ անհապաղ պետք է քններ գործը, սակայն քննել է մեկ ամիս հետո, բայց դա երկրորդ միջնորդության որոշումն է եղել: Մեկ ամիս անց դատական նիստ է նշանակել եւ հարցը քնել է դատական նիստով: Ասեմ, որ ես օրինակ՝ չէի հարուցի նման հիմքով կարգապահական վարույթ։ Նաիրա Գրիգորյանն առաջնորդվել է արդարադատության շահից, պահպանվել են օրենքով սահմանված բոլոր կանոնները»։

Դատավոր Գրիգորյանի փաստաբանը հայտնեց, որ իրենք իրենց առարկությունը գրավոր կարգով ներկայացրել են խորհրդին։

Գուրգոն Գրիգորյանի համոզմամբ՝ Բարձրագույն դատական խորհուրդը մերժելու է կարգապահական վարույթ հարուցելու մասին միջնորդությունը։