Արծրուն Հովհաննիսյանը հիմա էլ ԱԱԾ-ո՞ւմ է աշխատանքի անցել

Այսօր Սյունիքում տեղի ունեցող դեպքերի մասին հասարակությունը տեղեկացավ բացառապես լրատվամիջոցների շնորհիվ։ Ընդ որում՝ Սյունիքի մարզպետն էլ այդ մասին տեղեկացավ մեր լրագրողի զանգից։ Եւ եթե Սյունիքի համայնքապետերն ու պայքարող ժողովուրդը չլիներ, բոլոր հնարավոր միջոցներով՝ Պաշտպանության նախարարության, իշխանություններին մոտ կանգնած ուսուցչուհիների ու պատգամավորների, պետական տարբեր ստախոս կառույցների ու պաշտոնյաների միջոցով կրկին ապատեղեկատվություն կտարածեին եւ կհամոզեին, որ ադրբեջանցիների կողմից 3 կիլոմետր ՀՀ սահմանը խախտելն ու հսկայական տարածք ներխուժելը լրագրողների աչքին է երեւացել՝ նման բան չկա։ Արծրունհովհաննիսյանական գործելաոճն այս իշխանությունների կողմից սովորական բան է դարձել։ Ինչպես սովորական է դարձել լրագրողների բերանը փակելը, նրանց հասցեին սպառնալիքներ տեղալն ու տեղեկատվությունը թաքցնելը:

Իսկ Արծրուն Հովհաննիսյանի դերն արդեն ստանձնել է Ազգային անվտանգության ծառայությունը, որը ոչ միայն կեղծիք է տարածում, այլեւ սպառնալիքներ է տեղում։ Այսօրվա դեպքերի հետ կապված, օրինակ, մի խայտառակ հաղորդագրություն են տարածել, թե․ «ՀՀ ազգային անվտանգության ծառայությունը պաշտոնապես տեղեկացնում է, որ Սյունիքի մարզի տարածքում մեկնարկած ու ընթացող մարտերի վերաբերյալ զանգվածային լրատվության միջոցներով և սոցիալական ցանցերում տարածվող տեղեկություններն իրականությանը չեն համապատասխանում․․․ՀՀ ազգային անվտանգության ծառայությունը խստորեն զգուշացնում է զերծ մնալ ապատեղեկատվություն տարածելու, ազգաբնակչության շրջանում խուճապ առաջացնելու և անհարկի լարվածություններ հրահրելու գործելաոճից ու տեղեկացնում, որ նմանատիպ երևույթներն ունենալու են համապատասխան իրավական հետևանքներ՝ ամենախիստ գործիքակազմերի կիրառմամբ: Ազգային անվտանգության մարմինները դարձյալ հորդորում են զերծ մնալ ոչ պաշտոնական ու չճշտված տեղեկությունների տարածումից և ապավինել բացառապես պաշտոնական լրահոսին»:

Այստեղ են ասել՝ տո, լավ է։ Եթե դուք գործիքակազմ ունեք՝ մեր սահմանները պաշտպանեք եւ ՀՀ պետական սահմանը հատած թշնամու զորախմբերի նկատմամբ կիրառեք, այլ ոչ թե Սյունիքում տիրող իրական վիճակը հանրությանը ներկայացնող լրագրողների։ Անհարկի լարվածությունն էլ առաջանում է նրանից, որ դուք ավելի շատ Նիկոլ Փաշինյանի անձը պաշտպանելով եք զբաղված, քան մեր երկրի անվտանգությունը։ Իսկ ընդդիմության դեմ պայքարը ձեզ համար ավելի կարեւոր է, քան սահմանախախտ թշնամու դեմ պայքարը։ 

Դուք ազգային անվտանգության ծառայություն եք, ոչ թե իշխանությունների անվտանգության ծառայություն։ Մենք էլ ձեզ ենք հորդորում՝ զբաղվեք ձեր անմիջական պարտականությունների կատարմամբ եւ մի փորձեք պաշտոնական կեղծ լրահոսով կերակրել հասարակությանը՝ մենք դա արդեն տեսել ենք՝ 44 օր շարունակ եւ գիտենք, թե դա ինչ հետեւանքների է հանգեցնում։

Արմինե Օհանյան