Կոնդում տասնյակ քաղաքացիներ այցելում էին ՀՀԿ շտաբ, դուրս գալիս գումարով (տեսանյութ)
Երեկ Կոնդ թաղամասում տասնյակ քաղաքացիներ ընտրատեղամաս գնալուց առաջ անձնագրերով, մի խումբ մարդկանց ուղեկցությամբ այցելում էին Հայաստանի հանրապետական կուսակցության (ՀՀԿ) նախընտրական շտաբ:
Մոտ 15 րոպե «Ազատություն»-ը նույնպես հերթապահում էր շտաբի դիմաց, և երբ մեր թղթակիցը նկատեց, որ նրանցից մի քանիսը դուրս են գալիս գումարով, մտավ ներս, ու սկսվեց իրարանցում, ներսում գտնվողները արագ հավաքեցին փաստաթղթերը: Նրանցից մեկի ձեռքին մեծ քանակությամբ 5 հազար դրամանոցներ էին, «Ազատության» թղթակցին նկատելով՝ այդ տղամարդը թղթադրամներն անմիջապես ծալեց, դրեց պայուսակի մեջ ու վազելով դուրս եկավ շտաբից:
Շտաբում հավաքված մյուս քաղաքացիները նույնպես արագ հեռացան, հետո շտաբում գտնվող Սոնյա Եղյանը, ով, ի դեպ, Հանրապետականի ավագանու ցուցակով թեկնածու է, ասաց, որ ինքն է շտաբի լիազոր ներկայացուցիչը և որևէ գումար չի տեսել, շտաբում գումար չեն բաժանում: Նա վստահեցրեց, որ պարզապես քաղաքացիները իր մոտ են գալիս տեղեկանք խնդրելու:
«Ազատության» տեսախցիկը ֆիքսել է, թե ինչպես այդ տղամարդու ձեռքին կա գումար, սեղանին կան ցուցակներ:
Հետևեք մեզ Facebook-ում