ՊՊԾ պետի եւ Սիսակ Գաբրիելյանի նկատմամբ քրեական գործ կհարուցվի. դատարանը բավարարեց Արծվիկ Մինասյանի բողոքը

Երեւանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, այսօր՝ ապրիլի 29-ին, բավարարել է 2020 թվականի դեկտեմբերին 28-ին ԱԺ շենքի մոտ խաղաղ ակցիայի ընթացքում ոստիկանների անհամաչափ գործողությունների, ԱԺ «Իմ քայլը» խմբակցության պատգամավոր Սիսակ Գաբրիելյանի եւ ՊՊԾ պետի կողմից քաղաքացիների նկատմամբ ուժ կիրառելու փաստի առթիվ քրեական գործ հարուցելը մերժելու ՀՔԾ որոշման դեմ ՀՅԴ ԳՄ անդամ Արծվիկ Մինասյանի բողոքը։

Հիշեցնենք, որ ԱԺ-ի դիմաց բողոքի ակցիայի ժամանակ ծեծկռտուք էր տեղի ունեցել ցուցարարների եւ ԱԺ «Իմ քայլը» խմբակցության պատգամավոր Սիսակ Գաբրիելյանի միջեւ: Վերջինս բռունցքներով հարվածներ էր հասցրել ցուցարարներից մեկին, հնչեցվել էին երկուստեղ հայհոյանքներ:

Նշենք, որ Սիսակ Գաբրիելյանի մասնակցությամբ միջադեպով ՀՔԾ-ում քննվում է քրեական գործ։ NEWS.am-ին հայտնել էին, որ այդ գործով Սիսակ Գաբրիելյանը տուժող է ճանաչվել։ Մեղադրանք է առաջադրվել մեկ անձի՝ ՀՀ ՔՕ 258-րդ հոդվածի 3-րդ մասի 1-ին կետով (խուլիգանություն, որը կատարվել է մի խումբ անձանց կամ կազմակերպված խմբի կողմից)։