Անկախ պատգամավորները դիմել են ԱԺ խմբակցություններին՝ Հրաչյա Հակոբյանի հայտարարությունների հետ կապված էթիկայի հանձնաժողով ստեղծելու առաջարկով
Իրենք պետք է հասկանան, որ պատգամավորը իրավունք չունի նման վարքագիծ դրսևորել և ազդել անվտանգության օղակների վրա, սա պետք է բարձրաձայնվի։ Այս մասին Tert.am-ի հետ զրույցում ասաց պատգմավոր Սոֆյա Հովսեփյանը՝ անդրադառնալով «Իմ քայլը» խմբակցության պատգամավոր Հրաչյա Հակոբյանի հայտարարություններին, որի հետ կապված անկախ պատգամավորներ Սոֆյա Հովսեփյանը, Աննա Գրիգորյանը, Գոռ Գևորգյանը, Թագուհի Թովմասյանը, Վարդան Աթաբեկյանը և Գևորգ Պետրոսյանը գրավոր դիմել են ԱԺ խմբակցություններին՝ էթիկայի հանձնաժողով ստեղծելու առաջարկով։
«Իմ քայլը» խմբակցության պատգամավոր, Նիկոլ Փաշինյանի աներձագ Հրաչյա Հակոբյանը, անդրադառնալով Սյունիքում Նիկոլ Փաշինյանի այցի ժամանակ տեղի ունեցած բողոքի ակցիաներին և դրանից հետո բերման ենթարկվածներին, ասել էր․ «Այ տենց ստորացնելով բերման պետք ա ենթարկեն, բա ի՞նչ պետք է անեն»:
Ըստ Սոֆյա Հովսեփյանի՝ պատգամավորը ոչ միայն իրավունք չունի նման վերաբերմունք արտահայտել, այլ նաև պարտավոր է կանխելու նման գործողությունները։ «Այդ հարցը պետք է քննվի, բայց թե կքննվի հանձնաժողովում, թե խմբակցությունում, ճանաչելով իրենց՝ կարող է առանձնահատուկ վերաբերմունք չլինել, կամ կարող է ներողություն խնդրի իր մոտեցման համար։ Շատ մեծ հույսեր չունեմ, բայց այդ քայլը պետք է արվեր»,–ասաց նա։
Հետևեք մեզ Facebook-ում