Փաստաբանը` Արծվիկ Մինասյանի քրոջ որդու գործի, նրա կալանավորման միջնորդության մասին

ՀՅԴ ԳՄ անդամ Արծվիկ Մինասյանի քրոջ որդուն՝ Հայկ Հեքիմյանին, կալանավորելու մասին նախաքննական մարմինը երեք հիմք է նշել` թաքնվելու, նոր հանցանք կատարելու ու խոչընդոտելու հիմքերը։ Այս մասին այսօր լրագրողների հետ զրույցում ասաց Հեքիմյանի պաշտպան Բենիկ Գալստյանը։

Փաստաբանի խոսքով` այդ հիմքերը գոյություն չունեն, քրեական գործի նախաքննությամբ էլ հերքվել են։

«Նախաքննական մարմինը նշում է, որ անձը կարող է քննությունից թաքնվել, ի ապացույց դրան՝ բերում է այն հանգամանքը, որ հանցանք կատարելուց հետո անձը թաքնվել է, ինչը իրականությանը չի համապատասխանում։ Դեպքից հետո Հեքիմյանը մնում է նշված վայրում, ըստ էության՝ վերջինն է հեռանում նշված վայրից։ Նա փորձում է օգնություն ցուցաբերել ոստիկաններից մեկին, ում ինքնազգացողությունը վատացել էր։ Հաջորդ օրը նա գնում է հասարակական վայր, մասնակցում է ջահերով երթին, ընթացքում նրան բերման են ենթարկում ոստիկանության բաժին։

Նախաքննական մարմինը նշում է, որ դեռեւս անհրաժեշտ է հարցաքննել մի շարք անձանց, հաշվի առնելով այդ հանգամանքը,Հեքիմյանը կարող է խոչընդոտել գործի քննությանը, ճնշում գործադրելով այդ անձանց վրա։ Ունենք ոստիկանության աշխատակից, որը ցուցմունք է տվել որպես վկա, ունենք ոստիկանության աշխատակից, որը ճանաչվել է տուժող, ցուցմունք է տվել, առերեսվել է իմ պաշտպանյալի հետ, ունենք դատախազության տեսագրություններ, դրանք տրամադրվել են քննչական մարմնին։ Ըստ քննչական մարմնի տրամաբանության՝ պաշտպանյալս մնալով ազատության մեջ պետք է ճնշում գործադրի ոստիկանության աշխատակիցների վրա։

Քննիչն ասում է՝ հաշվի առնելով այն հանգամանքը, որ հետպատերազմյան իրավիճակով պայմանավորված, Հայաստանում տեղի են ունենում զանգվածային բողոքի ցույցեր, մեծ է հավանականությունը, որ Հեքիմյանը կմասնակցի այդ միջոցառումներին եւ կրկին կկատարի հանցանք։ Այսինքն՝ նախաքննական մարմինն ասում է՝ մենք չենք ուզում ինչ-որ մեկը մասնակցի ցույցերին, դրա համար յուրաքանչյուր շանսի դեպքում ցույցին մասնակցած անձանց ուղղակի փորձում ենք ազատությունից զրկել»։

Հիշեցնենք, որ ի պաշտպանություն ձերբակալված սյունեցիների՝ ապրիլի 22-ին՝ ՀՀ դատախազության դիմաց տեղի ունեցած ակցիայի առնչությամբ հարուցված քրեական գործով Հեքիմյանին մեղադրանք է առաջադրվել ՀՀ ՔՕ 316-ի հոդվածի 1-ին մասի հատկանիշներով (իշխանության ներկայացուցչի նկատմամբ բռնություն գործադրելը)։

Նրա ձերբակալումը դատարանը ճանաչել էր ոչ իրավաչափ։

Աղբյուր՝ Hraparak.am