Պա՛պ, Ռոբերտի փոխարեն չեղար, բայց հիմա իրենց հետ ես. զոհված կապիտանի դստեր հուզիչ գրառումը

«2016 թ. ապրիլի 1-ի լույս 2-ի գիշերը 25-ամյա զինադադարից հետո հակառակորդի նախաձեռնությամբ Արցախի Հանրապետության Պաշտպանության բանակի եւ Ադրբեջանի Հանրապետության զինված ուժերի միջեւ սկսվեցին լայնամասշտաբ ռազմական գործողություններ, որը հետագայում կոչվեց Քառորյա պատերազմ կամ Ապրիլյան պատերազմ։

Ապրիլյանը հայ ժողովրդին տվեց նոր հերոսներ, ցավոք՝ նաեւ նրանց կյանքերի գնով։

Հիշում եմ ամեն պահը... Հիշում եմ մեր քաջ զինվորների սխրանքը։ Այդ օրերին մտածում էի, որ անգնահատելի է նրանց կատարածը եւ, երեւի թե, չի լինի այնպիսի պարգեւ, որ հավասարազոր լինի նրանց այսքան նվիրվածությանը:

Հիշում եմ այդ օրերին հորս հետ խոսել չէր լինում... Աբաջյան Ռոբերտին, Ալեքսանյան Բագրատին, Բերակչյան Տիգրանին, հայրս էր ճանապարհել զինվորական ծառայության, քանի որ աշխատում էր Արաբկիր Զ/Կ ում:

Հիշում եմ հորս արցունքները, ասում էր. «Ես դարձել եմ «Հին օրերի երգը» ֆիլմի Նիկոլը, ախր էդ տղերքին ես եմ ճանապարհել: Հիմա ո՞նց գնամ ասեմ` չկան:

Հորս զոհվելուց հետո խոսեցի Ռոբերտի եղբոր հետ: Ռուբենը պատմում էր.

«Ռոբերտից տեղեկություն չունեի, գնացի վաենկոմատ ու առաջինը Իշխանը դիմացս դուրս եկավ , ու ասեց. «Հավատա կուզեի Ռոբերտի փոխարեն ես լինեի… Պատերազմ, պատերազմից հետո... Պա՛պ, Ռոբերտի փոխարեն չեղար, բայց հիմա իրենց հետ ես…», - գրում է արցախյան 44 օրյա պատերազմում զոհված կապիտան Իշխան Պետրոսյանի դուստրը` Մարգարիտա Պետրոսյանը։