«Ամենակողմ» պատգամավորը Շիրակ Թորոսյանն է, «ամենադեմը»՝ Արամ Սարգսյանը, ամենահետաքրքրասերն էլ Միքայել Մելքումյանն է
Վեցերորդ գումարման Ազգային Ժողովը շուտով պատմություն կդառնա: Հաջորդիվ ականատես կլինենք արդեն յոթերորդ գումարման Ազգային Ժողովի աշխատանքներին:
Վեցերորդ գումարումը թեև կարճ կյանք ունեցավ, սակայն հասցրեց ապահովել քաղաքական դաշտի ինտրիգներն ու զարգացումները:
Zham.am-ը ամփոփել է վեցերորդ գումարման խորհրդարանի պատգամավորների աշխատանքները՝ ըստ Parliament monitoring ծրագրի տվյալների: ]
Այսպես, վեցերորդ գումարման խորհրդարանում «ամենակողմ» պատգամավորը Շիրակ Թորոսյանն է, ով 515 անգամ կողմ է քվեարկել:
Պակաս «կողմասեր» չի նաև Հայաստանի քրդական համայնքի ղեկավար, ազգային փոքրամասնության քվոտայով ՀՀԿ պատգամավոր Կնյազ Հասանովը, ով կողմ է քվեարկել 509 անգամ:
Խորհրդարանում ընդհանրապես կողմ չեն քվեարկել 9 պատգամավորներ՝ այդ թվում Գագիկ Ծառուկյանը, Հակոբ Հակոբյանը, Սպարտակ Սեյրանյանը, Հրանտ Դավթյանը և այլք:
Վեցերորդ գումարման խորհրդարանի «ամենադեմ» պատգամավորը «ԵԼՔ» խմբակցության պատգամավոր Արամ Սարգսյանն է, նա դեմ է քվեարկել 111 անգամ:
Հաջորդը նույն խմբակցության պատգամավոր Գևորգ Գորգիսյանն է, ով դեմ է քվեարկել 104 անգամ:
Խորհրդարանի ամենաձեռնպահ պատգամավորը «Ծառուկյան» խմբակցության պատգամավոր Վահե Էնֆիաջյանն է: Նա ձեռնպահ է եղել 28 անգամ:
Քվեարկություններին ամենաշատը չի մասնակցել «Ծառուկյան» խմբակցության պատգամավոր Մելիք Մանուկյանը՝ 148 անգամ:
Հաջորդը նույն խմբակցության պատգամավոր Դավիթ Մանուկյանը և հհկ-ական Սեյրան Սարոյանն են, ովքեր չեն քվեարկել 105 անգամ:
Խորհրդարանի նիստերին ամենաշատը բացակայել է Գագիկ Ծառուկյանը՝ 512 անգամ, նրան հաջորդում է նույն խմբակցության պատգամավոր, «Մուլտի գրուպ» կոնցեռնի գործադիր տնօրեն Սեդրակ Առուստամյանի դուստրը՝ Նորա Առուստամյանը, ով բացակայել է 214 անգամ:
Բացակայողների եռյակը եզրափակում է հհկ-ական փոխխոսնակ Արփինե Հովհաննիսյանը, ով բացակայել է 205 անգամ:
Խորհրդարանի ամենապարտաճանաչները 4-ն են
Սերգեյ Բագրատյան,
Վանիկ Ասատրյան,
Կնյազ Հասանով,
Օհանյան Այծեմնիկ:
Նրանք ոչ մի անգամ չեն բացակայել նիստերից:
Բացակայություններ չունի նաև Նաիրա Կարապետյանը, սակայն հաշվի առնելով, որ նա միայն նոյեմբերի վերջերից է պատգամավոր դարձել, նրան չենք ներառում պարտաճանաչների խմբի մեջ:
Նկատենք, որ բացակայությունները խորհրդարանում մեծ խնդիր են դարձել, դրանց պատճառով ԱԺ նիստերը հաճախ չեն էլ կայացել:
Դա վերջերս այնքան էր բարկացրել ԱԺ նախագահ Արա Բաբլոյանին, որ նա կես կատակ-կես լուրջ սպառնաց աշխատավարձերից պահումներ անել:
Խորհրդարանի ամենաակտիվ պատգամավորը փոխխոսնակ Միքայել Մելքումյանն է, ով ելույթ է ունեցել 68 անգամ, հարց ուղղել 85 անգամ:
Հաջորդ ամենահետաքրքրասեր պատգամավորը Սերգեյ Բագրատյանն է՝ նա հարցերով հանդես է եկել 79 անգամ: Բագրատյանը ելույթների թվով ևս երկրորդն է՝ 34 անգամ:
Երրորդ հետաքրքրասերը հհկ-ական Խոսրով Հարությունյանն է, նա հարց է ուղղել 35 անգամ:
Ելույթների թվով երրորդը Նաիրա Զոհրաբյանն է, ով ելույթ է ունեցել 33 անգամ:
Խորհրդարանում ամենաանհետաքրքրասերները 40-ն են, այդ թվում՝
Սամվել Ալեքսանյանը,
Գագիկ Ծառուկյանը,
Վարդան Ղուկասյանը,
Արմեն Աշոտյանը,
Արայիկ Գրիգորյանը,
Աշոտ Արսենյանը,
Իշխան Զաքարյանը,
Կարեն Կարապետյանը և այլք:
Ամենաքչախոս պատգամավորները 42-ն են, այս պատգամավորները ոչ մի անգամ ելույթ չեն ունեցել, նրանց թվում են՝
Գալուստ Սահակյանը,
Նապոլեոն Ազիզյանը,
Սամվել Ալեքսանյանը,
Գագիկ Ծառուկյանը,
Վարդան Ղուկասյանը,
Շուշան Պետրոսյանը,
Արմեն Աշոտյանը,
Արայիկ Գրիգորյանը,
Աշոտ Արսենյանը,
Իշխան Զաքարյանը և այլք:
Պատրաստեց Ակաթի Վահանյանը