Ինչո՞ւ ժողովրդի անունից խոսող Թեհմինեն հավաքեց ընդամենը... 150 ձայն: Ո՞ւր էր ժողովուրդը
Այսօր արդեն բոլորիս հայտնի են ՀՀ արտահերթ խորհրդարանական ընտրությունների արդյունքները: Ոմանց սպասելիքներն իրականացված են, իսկ ոմանք` խորը հիասթափված:
Խոսելով ժողովրդավարությունից` զուտ ժողովրդավարության սկզբունքներից ելնելով, ցանկանում եմ անդրադառնալ թիվ 12 ընտրատարածքում առաջադրված Քաղաքացու որոշում սոցիալ-դեմոկրատական կուսակցության պատգամավորի թեկնածու Թեհմինե Ենոքյանին, ով` լինելով լրագրող, բնապահպան, ժողովրդասեր ու անտիԱմուլսար, բազմիցս Ամուլսարի հանքի շահագործման դեմ կազմակերպված ցույցերին ՈՉ-ի կոնտեքստում խոսել է տեղաբնակների անունից` ներկայացնելով բնակիչների տեսակետը, մտավախությունն ու հանքի շահագործմանը դեմ լինելը: Ստացվում է` տեղաբնակների և բնապահպան-ակտիվիստների սերտ համագործակցության արդյունքում, նրանք դարձել էին թիմակից, գաղափարակից, իսկ բնապահպանները` ի դեմս տեղաբնակների, նրանց վստահված անձինք:
Հիմա, փաստացի ունենալով ընտրությունների արդյունքները, տեսնում ենք, որ Թեհմինե Ենոքյանը թիվ 12 ընտրատարածքում, այն է Սյունիք և Վայոց Ձոր (Նշենք, որ երկու մարզերն էլ բնապահպանների աչքերում էկոլոգիական աղետի ռիսկեր ունեն:), 94.423 ընտրողներից վաստակել է ընդամենը 150 ձայն (Եթե ես թեկնածությունս դնեի` մենակ ծանոթ-բարեկամի տրամաբանությամբ ավելի շատ ձայն կհավաքեի):
Ինչո՞ւ: Գաղափարական կապը ինչ-որ տեղ կամ ինչ-որ պահի խզվե՞լ է: Չէ՞ որ, տրամաբանորեն, ի սկզբանե նրանց կապը քաղաքական տեսակետ չէր հետապնդում , և այս ընտրությունները փոխադարձ վստահությունն ու համակրանքն ապացուցելու ամենահարմար առիթն էին: Իսկ, գո՞ւցե այդ կապը բնավ գոյություն էլ չի ունեցել, և հենց սա այն հարմար առիթն էր, որ ժողովուրդը իսկապես և իրապես հայտներ իր տեսակետն ու մոտեցումը թե՛ Թեհմինե Ենոքյանին, թե՛ Ամուլսարի հանքի շահագործմանը:
Ատաքել Դավթյանի ֆեյսբուքյան էջից: