Փաշինյանին ամենաշատը վստահեցին Արարատի մարզում, ամենաքիչը՝ հարազատ Տավուշում
Դեկտեմբերի 9-ին կայացած արտահերթ ընտրությունների արդյունքներն արդեն հայտնի են: 2 մլն 592 հազար 481 ընտրողից քվեարկել է 1 մլն 260 հազար 840-ը, այսինքն, գրանցվել է 48.63 տոկոս մասնակցություն:
Ընտրությունների արդյունքներով խորհրդարան կանցնի երեք ուժ՝
«Իմ քայլը» դաշինք,
ԲՀԿ,
Լուսավոր Հայաստան կուսակցություն:
Բացարձակ առաջատարն «Իմ քայլը» դաշինքն է, որը ստացել է 884 հազար 849 քվե այսինքն 70,44 տոկոս:
Դաշինքն ամենաշատ ձայները հավաքել է թիվ 5 ընտրատարածքում՝ 81 հազար 111 քվե:
Ընտրատարածքն ընդգրկում է Արարատի մարզը, որտեղ ռեյտինգային ընտրակարգով առաջադրվել էր նաև Քպ-ական մարզպետ Գարիկ Սարգսյանը, ով ստացել է 22 հազար 604 ձայն:
«Իմ քայլը» մեծ թվով ձայներ է հավաքել նաև Երևանի Մալաթիա Սեբաստիա և Շենգավիթ վարչական շրջաններն ընդգրկող թիվ 3 ընտրատարածքում՝ 79 հազար 886 քվե:
Այս ընտրատարածքում առաջադրված էին ՔՊ-ի առաջամարտիկները՝ առաջին փոխվարչապետ Արարատ Միրզոյանը, ԿԳ նախարար Արայիկ Հարությունյանը, Նիկոլ Փաշինյանի աներորդի Հրաչյա Հակոբյանը, փոխարտգործնախարար Ռուբեն Ռուբինյանը, բնապահպանության նախարար Էրիկ Գրիգորյանը:
Դաշինքը մեծաթիվ ձայներ է հավաքել նաև թիվ 10 ընտրատարածքից՝ 79 հազար 254 քվե, որն ընդգրկում է Կոտայքի մարզը: Հատկանշական է, որ այս մարզը մշտապես համարվել է բհկ-ական մարզ, սակայն այստեղ «Իմ քայլը» դաշինքը պարզապես ջախջախել է ԲՀԿ-ին, որը հավաքել է ընդամենը 19 հազար 275 ձայն:
«Իմ քայլը» դաշինքից Կոտայքի մարզում ռեյտինգային ընտրակարգով առաջադրվել էր պատգամավոր Սասուն Միքայելյանը, ՔՊ-ական մարզպետ Ռոմանոս Պետրոսյանը: Բացի այդ, Քպ-ական է նաև մարզկենտրոն Հրազդանի քաղաքապետ Սևակ Միքայելյանը, ով Սասուն Միքայելյանի որդին է:
Սասուն Միքայելյանը հավաքել է 31 հազար 739 ձայն, Ռոմանոս Պետրոսյանը՝ 20 հազար 934 ձայն:
ԲՀԿ-ից այս ընտրատարածքում առաջադրվել էր Գագիկ Ծառուկյանի թիկնազորի պետ Էդուարդ Բաբայանը՝ ով հավաքել է 7 472 ձայն և Ծառուկյանի դստեր ամուսինը՝ Դավիթ Մանուկյանը՝ 4 560 ձայն:
Թիվ 2 ընտրատարածքում, որն ընդգրկում է Երևանի Արաբկիր, Աջափնյակ, Դավթաշեն վարչական շրջանները, դաշինքը հավաքել է 73 հազար 610 քվե:
Ռեյտինգային ընտրակարգով այստեղ առաջադրվել էր փոխվարչապետ Տիգրան Ավինյանը, պատգամավոր Լենա Նազարյանը, Տրանսպորտի, կապի և ՏՏ նախարար Հակոբ Արշակյանը, մշակույթի նախարար Լիլիթ Մակունցը և այլք:
Թիվ 6 ընտրատարածքում, որն ընդգրկում է Արմավիրի մարզը, «Իմ քայլը» հավաքել է 69 հազար 512 ձայն:
Այստեղ ռեյտինգային ընտրակարգով առաջադրվել էր ծանրամարտիկ Առաքել Միրզոյանը և Լուսավոր Հայաստանից վերջերս դուրս եկած Վիկտոր Ենգիբարյանը:
Դաշինքն ամենաքիչ ձայները հավաքել է Արագածոտնի մարզն ընդգրկող թիվ 7 և Տավուշի մարզն ընդգրկող թիվ 13 ընտրատարածքներում՝ 42084 և 42532:
Հատկանշական է, որ Տավուշի մարզը Նիկոլ Փաշինյանի հարազատ մարզն է, նա ծնունդով մարզկենտրոն Իջևան քաղաքից է: Փաշինյանին, թերևս, ամենաքիչը վստահեցին հարազատ մարզում:
Ռեյտինգային ընտրակարգով այստեղ առաջադրվել էին Նիկոլ Փաշինյանի եղբորորդի Սիփան Փաշինյանը, ով ստացավ ամենաշատ ձայները և մարզպետ Վահե Ղալումյանը:
Պատրաստեց Ակաթի Վահանյանը