ՀՅԴ-Փաշինյան հարաբերությունները լարվել են. ՀՅԴ-ն կարող է լքել կառավարությունը
Փաշինյան-ՀՅԴ հարաբերությունները վերջին շրջանում լարվել են: Իրավիճակն այնքան անհուսալի է, որ ՀՅԴ բյուրոյի ներկայացուցիչ Հրանտ Մարգարյանը հրապարակային է խոսում այդ մասին: Մարգարյանը լրատվամիջոցներից մեկի հետ զրույցում հայտարարել էր, որ չի կարողանում կապ հաստատել ու հանդիպել վարչապետ Փաշինյանի հետ: Եվ սա այն դեպքում, երբ որպես գործընկեր կուսակցության ներկայացուցիչ Մարգարյանն ու Փաշինյանը քննարկելու բազմաթիվ հարցեր պետք է ունենան:
Փաստ է, որ ՀՅԴ-ն անգամ Լևոն Տեր-Պետրոսյանի իշխանության օրոք, երբ արգելափակված է եղել կուսակցությունը, ու մի շարք դաշնակցականներ բանտերում, կապի մեջ է եղել և արտաքին քաղաքական հարցերում աջակցել ԼՏՊ կառավարությանը։
Վարչապետի նման պահվածքը ՀՅԴ-ին լուրջ մտորելու տեղիք պիտի տա: Ի վերջո ՀՅԴ-ն գաղափական կուսակցություն է, սփյուռքում ունի բազմաթիվ կառույցներ, որոնք աջակցում են Հայաստանի արտաքին քաղաքականությանը: Նման կուսակցությունը չի կարող հանդուրժել անտեսում և գուցե մոտ ժամանակներս ՀՅԴ-ական նախարարները հրաժարվեն իրենց պորտֆելներից և մաս չկազմեն Փաշինյանի կառավարությանը: Սա տրամաբանական կլինի, քանի որ կառավարությունում նրանք կարծես արդեն գործընկերներ չեն Փաշինյանի հետ: