Իմ Արցախ գնալը կախված է Հայաստանի իշխանություններից, եթե որոշեն՝ այնտեղ կլինեմ․ Սամվել Բաբայան․ ՏԵՍԱՆՅՈՒԹ
Վճռաբեկ դատարանն այսօր փոխեց նաև գործով անցնող և անազատության մեջ գտնվող մյուս երկու ամբաստանյալների խափանման միջոց կալանքը:
Լեռնային Ղարաբաղի պաշտպանության նախկին նախարար Սամվել Բաբայանը Վճռաբեկ դատարանի այսօր հրապարակած որոշմամբ ազատ արձակվեց կալանքից՝ Ազգային ժողովի «Ելք» և «Ծառուկյան» խմբակցությունների մի խումբ պատգամավորների երաշխավորության դիմաց:
Վճռաբեկ դատարանը փոխեց նաև գործով անցնող և անազատության մեջ գտնվող մյուս երկու ամբաստանյալների խափանման միջոց կալանքը՝ պատգամավորների անձնական երաշխավորությամբ և գրավով:
Վճռաբեկը բեկանեց Վերաքննիչ դատարանի որոշումը Բաբայանի և մյուսների գործով ընդհանուր իրավասության դատարանի վճիռը անփոփոխ թողնելու մասին՝ գործը ուղարկելով նոր քննության:
Լրագրողների հետ զրույցում Սամվել Բաբայանը նշեց, որ դեռ կապացուցի, որ ինքը եղել է քաղբանտարկյալ։ «Ես դեռ կապացուցեմ, որ այնպես ինչպես ինձ հետ են վարվել, նման էր նրան, որ մարդուն առևանգեն»,- ասաց նա:
Հարցին՝ արդյոք պատրաստվում է մեկնել Արցախ, Սամվել Բաբայանը պատասխանեց, որ իր Արցախ գնալը կախված է Հայաստանի իշխանությունների որոշումից և եթե որոշեն, որ ինքը պետք է լինի այնտեղ, կգնա, այնտեղ։ Սամվել Բաբայանը նաև նկատեց, որ Ղարաբաղը շատ վտանգավոր կետի է և չի կարելի այնտեղ խաղալ։
«Թողեք մինչև 20 թիվը խաղաղ ապրի, Ղարաբաղը, եթե ապրի»,- ասաց նա։
Մանրամասները՝ տեսանյութում։
Zham.am