Դավիթ Պետրոսյան. ««Տարկետում լինելու է» մեր սկզբունքը դառնում է իրականություն»
«Հանուն գիտության զարգացման» նախաձեռնության անդամների, պատգամավորների ու Կառավարության ներկայացուցիչների հետ նոյեմբերի 22-ին կայացած կլոր սեղան-քննարկումից հետո նախաձեռնության անդամ Դավիթ Պետրոսյանը հայտարարեց, թե իրենց հիմնական պահանջը՝ տարկետման տեղերի պահպանում, բավարարվել է: Այս մասին հայտնում է politik.am-ը:
«Տարկետում լինելու է» մեր սկզբունքը, որ դրված էր նախաձեռնության հիմքում՝ դառնում է իրականություն, խնդիրը մնում է` որքան տեղ, ինչ չափանիշներ ու հայտանիշներ կորոշեն»,-ասաց նա:
Հաջորդ կարևոր սկզբունքի հարցում, որը ենթադրում է կրթության անընդհատության սկզբունքի պահպանում, ըստ Պետրոսյանի՝ քննարկելու համաձայնություն եղավ:
Ըստ նրա` իրենք առաջարկում են ընդունված սկզբունքին, որ պետք է ծառայեն բոլորը, համադրեն իրենց առաջարկը՝ ոչ թե բուհը տանեն բանակ, այլ բանակը բերեն բուհ:
«Առաջարկի նպատակն է, որ անընդհատության սկզբունքը պահպանելով՝ արական սեռի ավելի շատ երիտասարդներ գնան ծառայեն և դա լինի իրենց ընտրության վրա: Դա կլինի նոր ծառայության ձև: Համաձայնություն եղավ, սկզբունքը քննարկվի, հարցը մեխանիզմների հետ է կապված: Մարդ ընտրության հնարավորություն է ունենում, պահպանում է գիտության անընդհատության սկզբունքը, ձեռք են բերում նաև ռազմական գիտելիքներ: Սրանով նաև կլուծվի այն շահարկման հարցը, թե մեկը ծառայած է, մյուսը` չէ»,-ասաց նա:
Ըստ Դավիթ Պետրոսյանի՝ սա աշխատանքային քննարկում էր և հիմք` հետագա քննարկումների համար: «Քաղաքական հասարակության ակտիվությունը գրավական էր, որ աշխատանքային քննարկումներ պետք է լինեն և այդ ճանապարհը չի դադարեցվելու, ավելի մասնագիտացվելու է և պրոֆիլացվելու»,-հայտարարեց նա:
Հարցին, թե հաստա՞տ է, որ տարկետում սկզբունքը իրականություն է դառնում, Դավիթ Պետրոսյանը նշեց, թե քննարկմանը որոշվեց, որ առաջնահերթությունները կորոշվեն և ԿԳՆ տարկետման տեղեր կնշանակի՝ հաշվի առնելով նաև բանակի կարիքները: «Հիմա ասել` իրականություն է, չեմ ուզում ասել ամբողջությամբ, ուղղակի պարզ չէ ինչ քանակով, որ մասնագիտությունների դեպքում և այլն»,-ասաց նա և եզրափակեց, որ երկու առաջարկն էլ իրենց համար սկզբունքային են լինելու և որոշվել է, որ եթե այնպիսի իրավիճակ ստեղծվի, որ ենթաօրենսդրական ակտերով հնարավոր չլինի ամրագրել, ապա դա կարվի օրենքի փոփոխությամբ:
«Ամեն ինչ անելու ենք սկզբունքներն իրականություն դարձնելու համար»,-ասաց նա